औद्योगिक क्षेत्रका उद्योगीहरूले आन्दोलन सुरू गरेका छन्।
आन्दोलनको पहिलो चरणअन्तर्गत देशभरका औद्योगिक क्षेत्रभित्र सञ्चालित उद्योगमा कालो झण्डा राखिएको छ।
उनीहरूले औद्योगिक क्षेत्र व्यवस्थापन लिमिटेडको सञ्चालक समितिबाट उद्योगीहरूको प्रतिनिधित्व हटाउने सरकारी निर्णयको विरोधमा आन्दोलन सुरू गरेको जनाएका छन्।
उद्योगीसँग कुनै छलफल नगरिएको, व्यवस्थापनको साधारणसभामा प्रस्ताव पनि नलगिएको, उद्योगीहरूको आवाज बेवास्ता गरिएको गुनासो नेपाल औद्योगिक क्षेत्र उद्योग महासंघको छ।
उद्योगमन्त्रीको निर्देशनमा एकपक्षीय रूपमा निर्णय गरिएको उनीहरूले आरोप लगाएका छन्।
महासंघले सञ्चालक समितिमा उद्योगी प्रतिनिधिले उद्योगहरूको हकहित संरक्षण, समस्या समाधान र औद्योगिक वातावरण सुधारमा भूमिका खेल्दै आएको जनाएको छ।
उद्योगीको प्रतिनिधित्व हटाउँदा नीति निर्माण र व्यवस्थापनमा समस्या बढ्ने दाबी गरिएको छ। यसले उद्योगमैत्री वातावरण कमजोर बनाउने पनि महासंघको भनाइ छ।
महासंघले निर्णय तत्काल खारेज गर्न माग गरेको छ।
सञ्चालक समितिमा उद्योगीहरूको प्रतिनिधित्व कायम गर्न पनि सरकारसँग आग्रह गरेको छ। माग नसुनिए थप कडा आन्दोलन गर्ने चेतावनी दिएको छ।
पहिलो चरणमा देशभरका औद्योगिक क्षेत्रमा आजबाट कालो झण्डा राखिएको छ।
साउन १ गतेको औद्योगिक क्षेत्र व्यवस्थापन लिमिटेडको वार्षिकोत्सव पनि बहिष्कार गर्ने महासंघद्वारा जारी विज्ञप्तिमा उल्लेख छ।
लिमिटेड र त्यसका शाखाले आयोजना गर्ने कुनै पनि कार्यक्रम र बैठकमा महासंघ, सदस्य संघका पदाधिकारी र उद्योगीहरू सहभागी नहुने निर्णय पनि गरिएको छ।
