नेपाली कांग्रेस सभापति गगन थापाले खाली तथा प्रयोगविहीन सरकारी भवन प्रयोग गरेर होस्टल निर्माण गर्ने योजना अघि सारेका छन्।
नेपाली कांग्रेसका सभापति गगन थापासँग खुला प्रश्नोत्तर कार्यक्रममा थापाले यस्तो बताएका हुन्।
‘काम र पढाइका लागि धेरै युवायुवती काठमाडौं आउँछन्। कतिपयले दाल–चामल त घरबाटै ल्याएर गुजारा चलाउँछन्,’ उनले भने, ‘निजी क्षेत्रमा काम गरेर मुस्किलले महिनामा २५ देखि ३० हजार कमाइ हुन्छ। कोठाभाडा असाध्यै महँगो तिर्नुपरेको छ।’
उनका अनुसार काठमाडौंमा रोजगारीका लागि आउने युवायुवतीको आवास समस्या समाधान गर्न यो योजना ल्याइएको हो।
सरकारसँग रहेका धेरै सरकारी भवन आवश्यकता भन्दा ठूला र आंशिक रूपमा मात्र प्रयोगमा रहेको उल्लेख गर्दै उनले ती भवनलाई पुनःउपयोग गरी होस्टलका रूपमा विकास गरिने बताए।
‘यति ठूलो सरकारी भवन आवश्यक छैन, खाली रहेका सरकारी भवन प्रयोग गरेर होस्टल बनाउने कामलाई प्राथमिकता दिन्छौं,’ उनले भने।
निजी क्षेत्रसँगको साझेदारीमा निर्माण गरिने ती होस्टल सरकारले सञ्चालन नगरी निजी क्षेत्रमार्फत सञ्चालन गरिने पनि उनले बताए।
-1746009348.jpg)
