अर्थमन्त्री डा. स्वर्णिम वाग्लेले सरकारले गरेका काममा कसैले औँला ठड्याउन नसकेको दाबी गरेका छन्।
सरकार गठन भएको करिब आठ महिना हुन लाग्दा पनि सरकारका काममा प्रश्न उठाउने अवस्था नरहेको उनको भनाइ छ।
यही गतिमा साढे चार वर्ष सरकार चलाएर आगामी निर्वाचनमा अझ ठूलो शक्तिका रूपमा फर्किने दाबी उनले गरे।
'साढे सात–आठ महिना हुन लाग्दा पनि कसैलाई औँला ठड्याउन पाएको छैन। साढे चार वर्ष यस्तै गरी सरकार चलाएर हामी फेरि ठूलो शक्ति भएर आउँछौँ,' नेपाल इन्फ्रास्ट्रक्चर समिटबारे आयोजित कार्यक्रममा मन्त्री वाग्लेले भने।
उनले सरकारले सुशासन कायम गर्दै भ्रष्टतन्त्र अन्त्य गर्ने बताए।
सरकारका सबै निकायबीच समन्वय गरेर काम भइरहेको उनको दाबी छ।
'जुद्धशमशेरपछि कुनै सरकार पाँच वर्ष चलेको थिएन। अब हामी क्रमभंग गर्छौं,' उनले भने, 'सरकारले क्लेप्टोक्रेसी (भ्रष्टतन्त्र) क्लिनअप गर्छ।'
वाग्लेले सरकारले कानुनी सुधारलाई पनि तीव्रता दिएको बताए। उनका अनुसार विगत साढे तीन वर्षमा ३५ वटा ऐन बनेका थिए।
अहिले सरकारले १६६ वटा ऐनमाथि काम गरिरहेको छ। तीमध्ये ५९ वटा ऐनलाई एउटै प्याकेजमा अघि बढाउने तयारी छ।
'हामी बिग ब्याङ गर्दैछौँ। कामको रफ्तार अब बढ्छ,' उनले भने।
पूर्वाधार विकासमा ठूलो लगानी र तीव्र कार्यान्वयनलाई सरकारले प्राथमिकता दिएको पनि उनले बताए।
एकैपटक आठदेखि १० वटा ठूला पूर्वाधार आयोजना अघि बढाउने गरी काम भइरहेको उनको भनाइ छ।
सबै विकासका काम राज्यले मात्रै गर्नुपर्ने अवस्था अन्त्य गर्ने नीति सरकारले लिएको उनले बताए।
पूर्वाधार विकासमा निजी क्षेत्रको सहभागिता बढाउने र निजी पुँजी परिचालन गर्ने सरकारको योजना रहेको उनको भनाइ छ।
निजी क्षेत्रलाई लगानीको बाटो खोल्ने गरी बजेट ल्याइएको र वैकल्पिक विकास वित्तसम्बन्धी व्यवस्था पनि कार्यान्वयनमा जाने उनले बताए।
वाग्लेले सरकारले अघि बढाएको सुशासनको प्रयासले अर्थतन्त्रमा सकारात्मक प्रभाव पारेको दाबी पनि गरे।
ठूलो बाढीपहिरोको सामना गर्नुपरे पनि राजस्व संकलनको गति राम्रो रहेको उनले बताए।
यसलाई उनले सुशासनको लाभांशका रूपमा व्याख्या गरे।
