इन्टरनेट सेवाप्रदायक कम्पनी सिजी नेटले वाई-फाई सिक्स प्रविधिमा आधारित नयाँ पुस्ताको इन्टरनेट सेवा सार्वजनिक गरेको छ ।
ग्राहकलाई अझ तीव्र, भरपर्दो र सहज इन्टरनेट अनुभव प्रदान गर्ने उद्देश्यले कम्पनीले यो सेवा सुरू गरेको हो।
कम्पनीका अनुसार वाई-फाई सिक्स प्रविधिमार्फत प्रयोगकर्ताले उच्च गति, न्यून लेटेन्सी तथा एकैपटक धेरै डिभाइसहरू सहज रूपमा जडान गर्न सक्ने सुविधा प्राप्त गर्नेछन्।
पछिल्लो समय भिडिओ स्ट्रिमिङ, अनलाइन गेमिङ, वर्क फ्रम होम तथा स्मार्ट होम डिभाइसहरूको प्रयोग बढ्दै गइरहेको सन्दर्भमा यस्तो प्रविधिले बढ्दो इन्टरनेट मागलाई प्रभावकारी रूपमा सम्बोधन गर्ने विश्वास कम्पनीले लिएको छ।
प्राविधिक रूपमा वाई-फाई सिक्समार्फत अधिकतम ९.६ जिबिपिएससम्मको गति प्राप्त गर्न सकिने बताइएको छ, जुन वाई-फाई फाइभको तुलनामा करिब ४.५ गुणा बढी ब्यान्डविथ हो।
साथै, यस प्रविधिमा लेटेन्सी करिब २० मिलिसेकेन्डसम्म सीमित हुने भएकाले भिडिओ कल वा अनलाइन गेमिङका क्रममा ल्याग हुने समस्या न्यून हुने कम्पनीको दाबी छ।
एकैपटक १२८ वटासम्म डिभाइस सपोर्ट गर्न सक्ने भएकाले धेरै प्रयोगकर्ता हुँदा पनि इन्टरनेटको गुणस्तर स्थिर रहने छ।
नेटवर्क क्षमतामा सुधार ल्याउन यसमा ओएफडिएमए, १०२४-क्युएएम तथा ८x८ एमयु-एमआईएमओ जस्ता आधुनिक प्रविधिहरू समावेश गरिएको कम्पनीले जनाएको छ।
नयाँ प्रविधिसँगै कम्पनीले विभिन्न प्याकेजहरू पनि सार्वजनिक गरेको छ।
जसअनुसार इन्टरनेट मात्रको वार्षिक शुल्क १४ हजार ४९९ रूपैयाँ तोकिएको छ भने मेस राउटरसहितको प्याकेज १७ हजार १३० मा उपलब्ध हुनेछ।
त्यसैगरी, आइपिटिभी सहितको प्याकेज १६ हजार २७६ रूपैयाँ तथा आइपिटिभी र मेस राउटर दुवै समावेश भएको प्याकेज १८ हजार ९०७ रूपैयाँमा पाइनेछ।
साथै, कम्पनीले नयाँ ग्राहकलाई लक्षित गर्दै ४०० एमबिपिएस गतिको इन्टरनेट सेवामा ९० दिनसम्म फुल रिफन्ड अफर समेत ल्याएको छ।
यस अफरअन्तर्गत ग्राहकले सेवा प्रयोग गरी सन्तुष्ट नभएमा ९० दिनभित्र पूर्ण रकम फिर्ता पाउने व्यवस्था गरिएको कम्पनीले जनाएको छ।
