बहुप्रतिक्षित तुलसीपुर–घोराही सडक खण्ड चार लेन बनाउने सम्बन्धी सोमबार आर्थिक प्रस्ताव खोलिएको छ।
अबको प्राविधिक र आर्थिक प्रस्तावको संयुक्त मूल्यांकन हुनेछ। यी सबै प्रक्रिया पूरा गर्दा झन्डै डेढ दुई हप्ता जति समय लाग्न सक्नेछ।
सडक डिभिजन दाङका प्रमुख इञ्जिनियर दिपेन्द्रबहादुर विष्टका अनुसार त्यसपछि ठेक्का स्वीकृत गर्ने आशयको सूचना जारी हुनेछ। जसबाट ठेक्का कसलाई पर्छ? भन्ने थाहा हुन्छ।
विष्टका अनुसार बढीमा अबको दुई हप्ताभित्रै ठेक्का स्वीकृत भइसक्ने छ।
तुलसीपुर–घोराही सडक चार लेनमा विस्तार गर्ने कार्यका लागि कुल पाँच जनाले बोलपत्र पेस गरेका थिए। ठेक्का हालेका पाँच जनामध्ये चार जना निर्माण व्यवसायी मात्रै प्राविधिक प्रस्तावमा सफल भएका थिए। ती चार जना बोलपत्र दाताहरूको आर्थिक प्रस्ताव सोमबार खोलिएको हो।
जसमा रौतहट/खानी जेभी प्राइभेट लिमिटेड, त्रियुगा नगरपालिका उदयपुर, लामा कन्स्ट्रक्सन कम्पनी प्रालि, महाराजगञ्ज काठमाडौं, आहिस निर्माण सेवा प्रालि, भक्तपुर–१० चितवन र दिवा/बन्दना भगवती जेभी बत्तिसपुतली काठमाडौं छन्।
सडक डिभिजन दाङका प्रमुख इञ्जिनियर विष्टका तीमध्ये न्यूनतम मूल्याङ्कित चार जना सारभूत रूपमा प्रभावग्राही बोलपत्र दातामध्ये एक जनालाई ठेक्का पर्नेछ।
प्राविधिक मूल्याङ्कनमा पास भएका र आर्थिक रूपमा पनि सबभन्दा कम कबोल अंक भएको निर्माण व्यवसायीले सडक विस्तारको ठेक्का पाउने छन्।
सडक विभाग अन्तर्गतको मदन भण्डारी राजमार्ग निर्देशनालयले तुलसीपुर–घोराही सडकको स्तरोन्नतिका लागि गत फागुन १ गते पहिलो पटक बोलपत्र आह्वान गरेको थियो।
तुलसीपुरको हात्तीखौवा चोकदेखि घोराहीको डिके पेट्रोल पम्पसम्मको झन्डै २१ किलोमिटर सडकखण्ड चार लेनमा स्तरोन्नति गर्न तीन अर्ब ९९ करोड रुपैयाँको बोलपत्र आह्वान गरिएको थियो।
सम्झौता भएको मितिले तीन वर्ष अर्थात् ३६ महिनाभित्र काम सक्ने प्रस्ताव बोलपत्रमा छ।
तुलसीपुर–घोराही सडकखण्ड सहरी सडक भएको हुँदा राष्ट्रिय सडक मापदण्ड अनुरूप बिबिएम र अस्पाल्ट विधिबाट कालोपत्रे गर्ने सर्त छ।बिबिएम ६ सेन्टिमिटर र अस्पाल्ट ४ सेन्टिमिटर मोटाइमा कालोपत्रे गर्ने प्रावधान राखिएको छ।
बोलपत्र अनुसार गाडी गु्ड्ने दुबै तर्फको भागमा ७/७ मिटर गरी सडकको १४ मिटर कालोपत्रे हुनेछ। प्रावधान अनुसार सडकको कुल भाग भने १५ मिटर एकतर्फ पिच हुनेछ भने बाँकी भाग फुटपाथका लागि छुट्याइएको छ।
अलि घना बस्ती भएको क्षेत्रमा २ मिटरदेखि त्योभन्दा बढी साढे २ मिटरसम्मको कभरसहितको फुटपाथ नाला निर्माण गरिने छ।
चार लेन सडकको बीचमा अवस्था हेरि साढे १ मिटरदेखि साढे २ मिटरसम्मको मेडियम पनि निर्माण गरिने छ।
बीचको मेडियम सडक सौन्दर्यकरणका लागि हुनेछ। त्यसमा बोट बिरूवा लगाउनेदेखि सडक सुरक्षाका कुराहरू पनि राख्न सकिने छ।
यसअघि यो सडक स्तरोन्नतिको काम २०७५ पुस १३ गतेबाट काम सुरू गर्ने गरी भारतीय निर्माण कम्पनी तथ्य इन्जिनियरिङ एन्ड इन्फ्रा प्रोजेक्ट प्रालि मुम्बईले ठेक्का पाएको थियो। सम्झौतामा ३० महिनाभित्र सडक विस्तारको काम सक्नुपर्ने उल्लेख थियो।
तुलसीपुरको हात्तीखौवा चोकदेखि घोराही बबईको पुलसम्मको करिब साढे २८ किलोमिटर सडक विस्तारको कामको भौतिक प्रगति ६ वर्षसम्म जम्मा १० प्रतिशत पनि भएको थिएन।
सडक विस्तारको काम भारतीय एक्जिम बैंकको एक करोड २१ लाख ८२ हजार तीन सय अमेरिकी डलरमा सडक निर्माणको जिम्मा तथ्य पाएको थियो।
भारतीय निर्माण कम्पनी तथ्यले जिम्मा लिए अनुरूप काम नगरेपछि दाङको तुलसीपुर–घोराही चार लेन सडक खण्डको सम्झौता नेपाल सरकारले २०८० जेठमा रद्द गरेको थियो।
त्यो बीचमा तथ्यका प्रतिनिधिले सडक निर्माणको काममा जथाभावी सडक खनेका हुँदा सवारी दुर्घटना बढेका थिए।
तुलसीपुर–घोराही सडक खण्डमा यात्रा गर्न निकै सास्ती खेप्नुपर्ने अवस्था थियो। त्यही भएर सरकार र जनप्रतिनिधिको ब्यापक आलोचना हुने गरेको थियो। निर्वाचनका क्रममा पनि सडक उम्मेदवारहरूको मुख्य एजेन्डा बनेको थियो।
त्यही भएर नेपाल सरकारले आफै निर्माण गर्ने गरी गत फागुन १ गते बोलपत्र आह्वान भएको थियो। अहिले आएर आर्थिक प्रस्ताव खोलिएको छ भने अब असार १५ सम्म ठेक्का स्वीकृत हुने लगभग निश्चित जस्तै भएको छ।
यो पनि:
तुलसीपुर–घोराही सडक चार लेन बनाउन बोलपत्र आह्वान
