कर्णाली प्रदेशमा पेट्रोलियम पदार्थको भण्डारण क्षमता बढाउने योजनाले गति लिन सकेको छैन।
बजेट अभाव, जग्गा पहिचान एवं प्राप्ति प्रक्रियामा ढिलाइ हुँदा सुर्खेतमा पेट्रोलियम पदार्थको भण्डारण गृह निर्माण योजना अघि बढ्न नसकेको हो।
संघीय सरकारले पछिल्ला वर्षका नीति तथा कार्यक्रम र बजेटमा समावेश गरे पनि यस योजनाले मूर्त रूप लिन सकेको छैन। नेपाल आयल निगमको सुर्खेतमा प्रादेशिक कार्यालय भए पनि भण्डारण डिपो छैन। जसले गर्दा निगमले नेपालगञ्जबाट ट्यांकरमा इन्धन आपूर्ति गर्दै पम्पलाई सिधै वितरण गर्ने गर्दछ।
निगमका प्रादेशिक कार्यालय प्रमुख राजकुमार केसीले कर्णाली प्रदेशमा भण्डारण डिपोको अतिआवश्यकता रहेको बताए।
‘अन्य सबै प्रदेशमा भण्डारण डिपो छन्, तर कर्णालीमा छैन’, उनले भने, ‘यहाँ डिपो नहुँदा पटक-पटक पेट्रोलियम पदार्थको अभाव हुने गरेको छ।’
हाल वीरेन्द्रनगरस्थित निगमको नाममा रहेको १८ कट्ठा क्षेत्रफलमा कार्यालयका साथै हवाई इन्धन र मट्टितेलको मात्र भण्डारण हुने गरेको छ।
हवाई इन्धन ६० हजार लिटर र मट्टितेल ४५ हजार लिटर भण्डारण क्षमता छ।
कार्यालय प्रमुख केसीले भने, ‘निगम परिसरमा रहेको जग्गामा भण्डारण ट्यांकी बनाउन ठाउँ पुग्दैन, दीर्घकालीन समाधानका लागि नयाँ स्थानमा जग्गा खोजेर निर्माण गर्नुपर्ने हुन्छ।’
निगमको प्राविधिक टोलीले वीरेन्द्रनगर–१ र भेरीगंगा नगरपालिका–१२ स्थित सामुदायिक वनको क्षेत्राधिकारमा रहेको जग्गामा प्रारम्भिक अध्ययन गरेको थियो। प्राविधिक टोली भेरीगङ्गा–१२ को जग्गालाई छनोट गर्ने टुंगोमा पुगेको बताएको छ। त्यहाँ १० बिघा जग्गा छ। निगमले यस वर्ष जग्गा प्राप्ति र विस्तृत सम्भाव्यता अध्ययनको काम सम्पन्न गर्ने लक्ष्य लिएको छ।
सुर्खेतमा भण्डारण सुविधा सहितको डिपो बनेपछि प्रदेशको दैनिक माग धान्नका लागि नेपालगञ्जमा भर पर्नुपर्ने अवस्था अन्त्य हुने बताइएको छ।
निगमका अनुसार कर्णाली प्रदेशमा दैनिक एक लाख लिटर डिजेल र ३० हजार लिटर पेट्रोल खपत हुने गर्दछ। भण्डारण गृह बनेपछि डिजेल चार दिन र पेट्रोल सात दिनसम्मको माग धान्नेछ।
सुर्खेत उद्योग वाणिज्य सङ्घका अध्यक्ष लक्ष्मण कँडेलले भण्डारण डिपो निर्माणमा ढिलाइ हुँदा कर्णालीवासीले पटक–पटक पेट्रोलियम पदार्थको अभाव झेल्नुपरेको बताए।
‘हामीले निगमलाई धेरैपटक अनुरोध गर्यौं, बजेटमात्र छुट्याउने होइन, काम पनि अघि बढ्नुपर्यो भन्दै आएका छौं’, उनले भने, ‘प्रदेशमा एउटा भण्डारण डिपो नहुनु दुःखद् हो, अहिलेजस्तो नेपालगञ्जबाट एक दिन मात्रै ढुवानी नहुँदा यहाँ इन्धन अभाव हुने अवस्थाको छिटो अन्त्य हुनुपर्छ।’
सुर्खेतको वीरेन्द्रनगरमा मात्रै सात वटा पम्प सञ्चालनमा छन्। ती सबै पम्पले नेपालगञ्जबाट इन्धन ढुवानी गर्नुपर्ने बाध्यता छ। जसले गर्दा मूल्य पनि महँगो पर्ने पम्प सञ्चालक बताउँछन्।
