आर्थिक वर्ष २०८२/८३ को पहिलो तीन महिना अर्थात साउन, भदौ र असोज महिनामा समग्र आर्थिक वृद्धिर ३.०२ प्रतिशत रहेको अनुमान गरिएको छ।
तर भदौ २३ र २४ को जेनजी आन्दोलन र त्यसको प्रभाव देखिएको यो समयमा ३ प्रतिशत माथिको आर्थिक वृद्धिदरलाई सकारात्मक मानिएको छ।
त्यस्तै, राष्ट्रिय तथ्यांक कार्यालयले अर्थतन्त्रका सबै क्षेत्र धनात्मक देखाएको छ।
योसँगै पछिल्ला लगातार चार त्रैमासदेखि अर्थतन्त्र मापन गर्ने १८ वटा सूचक नै धनात्मक देखिएका हुन्।
गत आर्थिक वर्षको पहिलो तीन महिनामा २.९ प्रतिशतको आर्थिक वृद्धिदरको अनुमान गरिएको थियो। त्यस क्रममा तीन वटा क्षेत्र ऋणात्मक वृद्धिदर देखाएको थियो।
राष्ट्रिय तथ्यांक कार्यालयका त्रैमासिक तथ्यांक अनुसार यसअघि अघिल्लो आर्थिक वर्षको दोस्रो, तेस्रो र चौथो त्रैमासमा क्रमशः ३.८ प्रतिशत, ४.३ प्रतिशत र ४.८ प्रतिशतको वृद्धिदर कायम थियो। त्यसपछि चालु वर्षको पहिलो त्रैमासमा पनि ३ प्रतिशतको वृद्धिदर अनुमान गरिएको हो।
अघिल्ला वर्षहरूमा नेपालको त्रैमासिक आर्थिक अवस्थाले प्रायः उतार–चढावको स्वरूप लिँदै आएको थियो। एक–दुई त्रैमास सुधार देखिए पनि त्यसपछि उद्योग, निर्माण, व्यापार जस्ता क्षेत्र पुनः ऋणात्मक अवस्थामा जाने क्रम दोहोरिन्थ्यो। विशेष गरी २०७९/८० र २०८०/८१ मा यस्तो अस्थिरता देखिएको थियो। तर पछिल्ला चार त्रैमासमा भने समग्र अर्थतन्त्र कुनै पनि अवधिमा ऋणात्मक देखिएको छैन।
चालु वर्षको पहिलो तीन महिनामा क्षेत्रगत विश्लेषणअनुसार विद्युत तथा ग्याससम्बन्धी क्रियाकलापमा सबभन्दा बढी वृद्धिदर (१४.९१ प्रतिशत) देखिएको छ। त्यसपछि वित्तीय तथा बीमा क्रियाकलापमा ७.०७ प्रतिशत, पेशागत, वैज्ञानिक तथा प्राविधिक क्रियाकलापमा ५.५२ प्रतिशत वृद्धिदर रहेको अनुमान गरिएको छ।
अर्थतन्त्रमा सबैभन्दा ठूलो योगदान दिने कृषि क्षेत्रको वृद्धिदर १.३६ प्रतिशत रहेको छ। धानबाली उत्पादन घटे पनि पशुपन्छी, तरकारी र फलफूल उत्पादनमा सामान्य वृद्धिले यस क्षेत्रको कुल मूल्य अभिवृद्धिमा सकारात्मक प्रभाव पुर्याएको छ।
थोक तथा खुद्रा व्यापार क्षेत्रले ३.८९ प्रतिशत वृद्धि हासिल गरेको प्रारम्भिक अनुमान छ। जुन व्यापारजन्य वस्तु उत्पादन र आयात वृद्धिको परिणाम मानिएको छ।
सबैभन्दा कम वृद्धिदर पानी आपूर्ति, ढल निकास, फोहोर व्यवस्थापन र मानव स्वास्थ्य तथा सामाजिक क्रियाकलाप क्षेत्रमा क्रमशः १.११ प्रतिशत र १.१९ प्रतिशत रहेको छ।
-1746009348.jpg)
