बिहीबार दिउँसो कार्यकक्षमै रहेका बेला भरतपुर महानगरकी प्रमुख रेनु दाहाललाई काठमाडौंबाट फोन आयो।
नेपाल सरकारले चितवनको भरतपुर विमानस्थल विस्तारको निर्णय गरेको फोनको सन्देश रहेछ। प्रमुख दाहाल आफ्नो कुर्सीबाटै जुरुक्क उठिन् र हर्षित हुँदै धन्यवाद दिइन्। काठमाडौंबाट फोनमा थिए, प्रधानमन्त्री पुष्पकमल दाहाल ‘प्रचण्ड’।
संवाद बाबुछोरीको हो। हामीले फोनबाट सुनेको धन्यवाद पनि उनले पिता दाहाललाई नै दिएकी थिइन्। तर यो संवादले भरतपुर विमानस्थललाई ठूलो जहाज बस्ने गरी विस्तार गर्ने सरकारको निर्णयको खुसीको खबर बोकेको थियो।
जुन काम महानगर प्रमुख दाहालको अघिल्लो कार्यकालदेखिकै सपना थियो। त्यसैले महानगर प्रमुख दाहालले प्रधानमन्त्रीसहित नेपाल सरकारलाई धन्यवाद ज्ञापन गरेकी थिइन्।
निर्णयपछि कार्यकक्षमा पुगेका सञ्चारकर्मीसँग महानगर प्रमुख दाहालले भनिन्, ‘मैले पहिलो कार्यकालको सुरुवातमै राखेको एजेन्डा थियो यो। आज सरकारले निर्णय गरेपछि आफ्नो वाचा र चितवनका जनताको माया अकस्मात सम्झिएँ र निकै खुसी भएँ।’
निरन्तर लागेर छ वर्षपछि मन्त्रिपरिषदबाट निर्णय गराउन सफल हुँदा निकै खुसी लागेको उनले बताइन्।
‘नेपाली सेनाको घोडा प्रजनन केन्द्र शक्तिखोर स्थानान्तरण गरेर विमानस्थलको धावनमार्ग विस्तार गर्ने निर्णय मन्त्रिपरिषद्ले गरेको छ। अब यो निर्णयलाई साकार पार्न यसअघि र अहिलेजस्तै चितवनका सबै नागरिकको साथ र सहयोग आवश्यक छ,’ उनले भनिन्।
हालका पर्यटन तथा नागरिक उड्डयनमन्त्रीसहित ६ वर्षमा छ जना मन्त्रीसँग विमानस्थल विस्तारका लागि छलफल गरेको महानगर प्रमुख दाहालले सुनाइन्।
उनले आफ्नो मोबाइलमा तस्बिर देखाउँदै भनिन्, ‘जिल्लाका सरोकारवालालाई जम्मा गरेर धेरै पटक बैठक बसियो। कहिले निराशा त धेरै आशा नै पलाएको हो। मलाई लाग्छ त्यसैले आज यो निर्णय हुन सकेको छ।’
विमानस्थल विस्तार भएपछि ठूला जहाज उडान भर्न सक्नेछन्। रात्रिकालीन उडान पनि हुनेछन्। यससँगै सस्तो मूल्यमा यात्रुले टिकट पाउनेछन्। अहिले भरतपुर–काठमाडौंको हवाई टिकट रु चार हजार आठ सय हाराहारी पर्छ। यकिन नभए पनि ठूला जहाज उड्दै गर्दा रु तीन हजार हाराहारीमै टिकटको मूल्य झर्ने अनुमान छ।
प्रमुख दाहालले भनिन्, ‘बिहान काठमाडौँ गएर दिनभरि काम गरेर साँझ फर्किन सकिन्छ।’ दुई साताअघि भरतपुरस्थित नेपाली सेनाको ब्यारेकमा आएका उपप्रधानमन्त्री तथा रक्षामन्त्री पूर्णबहादुर खड्काले प्रमुख दाहाललाई बोलाएका थिए। त्यतिबेला दाहाल काठमाडौँ थिइन्।
उनले विमानस्थल विस्तारका लागि सकारात्मक पहल गर्न प्रमुख दाहाललाई बोलाएका थिए। प्रमुख दाहालले निरन्तररुपमा विमानस्थल विस्तारका लागि पहल गरिरहँदा प्रधानमन्त्री प्रचण्ड यसलाई सार्थक बनाउन लागेका थिए।
रक्षा मन्त्रालय, नेपाली सेना, पर्यटन मन्त्रालय सबैलाई समेटेर यो काम गर्नुपर्ने अवस्था थियो। प्रमुख दाहालले भनिन्, ‘धेरै पटक म महानगरपालिकाको निर्णय बोकेर मन्त्री र प्रधानमन्त्री कार्यालयमा पुगेकी छु। पर्यटन र रक्षा मन्त्रालयमा धेरै पटक छलफल गर्यौं।’
भरतपुर विमानस्थलमा टर्मिनल भवन बन्दै गरेकाले अबको केही समयमै नयाँ टर्मिनल र ठूला जहाज अवतरण हुने विमानस्थल बन्ने उनले जानकारी दिइन्। यसैले पनि यथासक्य छिटो विमानस्थल विस्तार गर्नुपर्नेमा प्रमुख दाहालको जोड थियो।
चितवनबासी मात्रै होइन, छिमेकी जिल्लाका बासिन्दालाई पनि विमानस्थल विस्तार हुँदै गर्दा प्रत्यक्ष फाइदा पुग्छ,’ उनले भनिन्। नवलपरासीको दाउन्ने पूर्वदेखि हेटौँडासम्मका बासिन्दाको पायक विमानस्थल यही नै हो।
त्यसो त तनहुँ, गोरखा, लम्जुङ, धादिङबासीका लागि पनि यो विमानस्थल उपयोगी छ। देशकै तेस्रो पर्यटकीय गन्तव्य भएकाले चितवन आउने पर्यटकका लागि विमानस्थल महत्वपूर्ण हुने प्रमुख दाहाल बताउँछिन्।
‘हामीले अन्तर्राष्ट्रिय स्तरको क्रिकेट रङ्गशाला बनाउँदैछौँ, देश विदेशका खेलाडी र दर्शक यहाँ आउँछन्। त्यसका लागि पनि विमानस्थल विस्तार आवश्यक थियो,’ उनले भनिन्।
भरतपुरको नेपाली सेनाको ब्यारेक विमानस्थलसँग जोडिएको छ। ब्यारेकमा ७० बिगाहा आठ कठ्ठा चार धुर जग्गामध्ये १९ बिगाहा चार कठ्ठा चार धुर विमानस्थल विस्तारका लागि आवश्यक पर्ने देखिएको छ। यससँगै यहाँको घोडा प्रजनन केन्द्रलाई जिल्लाकै कालिका नगरपालिकाको शक्तिखोरस्थित ब्यारेक हाताभित्र स्थानान्तरण गरिने उनले बताइन्।
यो विमानस्थल २०१५ सालमा स्थापना भएर २०१८ सालदेखि सञ्चालन हुँदै आएको हो। विमानस्थलको हाल कूल क्षेत्रफल ६२ बिगाहा रहेको छ जसमा एक हजार दुई सय मिटरमात्र धावनमार्ग छ।
यो विमानस्थलबाट अहिले काठमाडौँ र पोखरा उडान हुँदै आएको छ। छोटो धावन मार्गका कारण साना जहाज दिउँसोमा मात्रै उडान हुँदा महँगो भाडा तिर्नुपर्ने बाध्यता छ।
