पूर्वसभासदद्वारा प्रतिनिधिसभाका सांसद सरहको मर्यादा माग

सेतोपाटी संवाददाता

काठमाडौं, जेठ ९

संविधान निर्माणमा भूमिका खेलेको भन्दै पूर्वसभासदहरूले वर्तमान प्रतिनिधि सभाका सांसद सरहको मर्यादा निर्धारणको माग गरेका छन्।

उनीहरूले संविधानसभा सदस्य मञ्च नेपाल गठन गरेर सभामुख कृष्णबहादुर महरालाई भेटी मर्यादा निर्धारणको माग राखेका हुन्।

हाल संघीय संसद सचिवालयले पूर्वसभासदहरूलाई लोगोको व्यवस्था गरेको छ। तर, पूर्वसभासदहरूले लोगोमा नेपालको झण्डा नभएको भन्दै असन्तुष्टि व्यक्त गरेका छन्। साथै लोगो गुणस्तरीय नभएको भन्दै आकर्षक लोगोको समेत माग राखेका छन्।

मञ्चका अध्यक्ष अनन्तप्रसाद पौडेलले संविधान निर्माणको ऐतिहासिक भूमिका खेलेका कारण मर्यादामा कमी गर्न नहुने बताए।

मञ्चले विगतमा व्यवस्थापिका संसद र संसदको राज्य व्यवस्था समितिमा समेत मर्यादाबारे छलफल भएकाले अहिले मर्यादा विचार गर्नुपर्ने माग गरेको छ। अहिलेको मर्यादा 'संविधानको गरिमा अनुकूल' नभएको पूर्वसभासदहरूले जनाएका छन्।

हाल प्रतिनिधिसभा र राष्ट्रियसभाका सांसदको मर्यादा आठौं स्थानमा रहेको छ। उनीहरूलाई राज्यमन्त्री सरहको मर्यादामा राखिएको छ। पूर्व सांसदहरूको मर्यादा भने १५ औं नम्बरमा रहेको छ। महानगरपालिकाका प्रमुखहरू सरह पूर्वसांसदको मर्यादा कायम गरिएको हो।

प्रकाशित मिति: बुधबार, जेठ ९, २०७५ ०१:२३

सिफारिस