नेपाली कांग्रेसका महामन्त्री विश्वप्रकाश शर्माले मंगलबार पार्टी कार्यालयमा भएको घटना गलत भएको बताएका छन्।
सामाजिक सञ्जालमार्फत आफ्नो धारणा सार्वजनिक गर्दै उनले विशेष बैठकका क्रममा प्रवेश व्यवस्थापन, नेतामाथि भएको व्यवहार र फैलिएको हल्लाबारे प्रतिक्रिया दिएका हुन्।
उनले समर्थन–विरोधका नाममा मर्यादा नाघ्ने प्रवृत्तिको आलोचना गरेका छन्। त्यस्तै संयम र परिपक्व राजनीतिक व्यवहार आवश्यक रहेकोमा जोड दिएका छन्।
उनले लेखेका छन् —
'पार्टीको केन्द्रीय कार्यालयमा विशेष बैठकहरू चलिरहेका बेला मिडिया बाहेक अरूलाई प्रवेशमा रोक लगाउने हाम्रो पुरानै परम्परा हो। राष्ट्रिय सभाको उम्मेदवारी चयन सम्बन्धी बैठकका कारण आज पनि अरूलाई प्रवेशमा रोक लगाइएको थियो। पार्टीका कतिपय साथीहरूले यो नबुझिदिँदा बाहिर व्यर्थमा समस्या उत्पन्न भयो।
कुनै पनि नेतासँग कसैको पनि समर्थन र विरोधको सम्बन्ध हुन सक्छ। तर त्यो निश्चित मर्यादाको दायरामा रहनुपर्छ। समर्थन गरिरहँदा देवत्वकरण गर्ने अनि विरोध गरिरहँदा अप्रिय टिप्पणी गर्ने कार्य हाम्रो राजनीतिको दुःखद र गलत पाटो हो।
आज अग्रज नेता विमलेन्द्र निधि कार्यालय पुग्दै गर्दा भएको व्यवहार बिल्कुलै गलत छ। यस्तो प्रवृत्तिलाई निरूत्साहित गर्नु र राजनीतिमा स्वस्थ राजनीतिक व्यवहारलाई मात्रै प्रोत्साहित गर्नु हामी सबैको कर्तव्य हो।
'विशेष महाधिवेशन पक्षधरले पार्टी कार्यालय घेराउ गर्ने' भनेर आएको भ्रमपूर्ण हल्लालाई साथीहरूले 'यस्तो कुनै कार्यक्रम नरहेको' भनेर सार्वजनिक रूपमा बिहानै स्पष्ट गरिसक्नुभएको थियो।
स्वयं नेता निधिले 'विशेष महाधिवेशन पक्षधरले होइन अरूले गरेको बुझेँ' भनेर मिडियामा थप स्पष्ट गर्नुभएकै छ। यस्तो तथ्यका बाबजुद विशेषका पक्षधर साथीहरूलाई त्यसमा छिटा पार्ने प्रयास देखिनु दुःखद छ र निन्दनीय पनि।
नम्रतासाथ मेरो आग्रह छ—राजनीतिमा सहमति/असहमति, समर्थन/विरोध सबै कुरा हुन्छ। तर सबैभन्दा बढी जरूरी हुन्छ संयम र परिपक्वता। यसलाई सबै तरिकाले गम्भीर आत्मसात गरौं!'
मंगलबार सानेपास्थित कांग्रेस केन्द्रीय कार्यालयमा विशेष महाधिवेशन पक्षधर कार्यकर्ताले विशेष महाधिवेशन चाहियो भन्दै घेराउ गरेपछि नेता विमलेन्द्र निधि रिसाएका थिए।
कार्यालयमा हुने केन्द्रीय कार्यसम्पादनको बैठकमा सहभागी हुन आइपुगेका निधिलाई बाहिर कार्यकर्ताहरूले घेरेका थिए।
कांग्रेस कार्यकर्ताहरूले घेरेर उनलाई 'विशेष महाधिवेशन हुन्छ कि हुँदैन दाइ?' भनेर प्रश्न गरेका थिए।
यसरी प्रश्न गर्दै घेरेपछि निधि रिसाएर ती कार्यकर्तालाई लक्षित गर्दै, 'कांग्रेसी होइनौ, को हो?' भनेका थिए।
कार्यकर्ताले 'कांग्रेस हो दाइ कांग्रेस' भन्दै जबाफ फर्काएका थिए।
अहिले नेपाली कांग्रेसका नेताहरू दुई पक्षमा विभाजन भएका छन्।
महामन्त्रीद्वय गगनकुमार थापा र विश्वप्रकाश शर्माले विशेष महाधिवेशन गर्ने अडान लिएका छन्।
सभापति शेरबहादुर देउवा र उनीपक्षभरले भने नियमित महाधिवेशन गर्ने भन्दै विशेष महाधिवेशनको औचित्यमाथि प्रश्न गर्दै आएका छन्।
-1746009348.jpg)
