चिनियाँ विदेश मन्त्री वाङ यी तीन दिने नेपाल भ्रमण सकेर मंगलबार दिउँसो स्वदेश फर्किएका छन्।
यीको भ्रमण केपी शर्मा ओली दोस्रो पटक प्रधानमन्त्री बनेपछि उत्तरी छिमेकी चीनबाट भएको पहिलो उच्चस्तरीय राजनीतिक भ्रमण हो।
विदेश मन्त्री यी पाकिस्तानको इस्लामावादबाट आइतबार काठमाडौं ओर्लिँदा बहुचर्चित केरूङ-काठमाडौं रेलमार्ग र चिनियाँ राष्ट्रपति सी चिनफिङको नेपाल भ्रमणबारे कुरा हुने अपेक्षा गरिएको थियो।
सोमबार परराष्ट्र मन्त्री प्रदीप ज्ञवाली र समकक्षी यीले नेतृत्व गरेका दुई देशका प्रतिनिधि मण्डलबीच राजधानीमा औपचारिक वार्ता भयो।
वार्ताका क्रममा के-के कुराकानी भयो, विस्तृत सार्वजनिक गरिएको छैन। बैठकपछि दुई देशका अधिकारीहरूले भने तीन वटा समझदारीपत्रमा हस्ताक्षर गरेका छन्।
चीनले मनाङमा ३५ करोड रुपैयाँमा अस्पताल बनाउने, आपतकालीन प्रयोगका लागि ५ हजार थान त्रिपाल दिने र बाढी प्रभावितलाई सहयोग गर्न १ करोड ६० लाख रुपैयाँ दिने समझदारीमा हस्ताक्षर भएको छ।
यी यस्ता समझदारी छन् जसमा भएको हस्ताक्षरको साक्षी बन्न विश्वको दोस्रो ठूलो अर्थतन्त्रका विदेश मन्त्री काठमाडौं ओर्लिरहनु पर्दैन।
रेल ल्याउन तम्सिएको सरकारले चिनियाँ विदेश मन्त्री आउँदा गरेका समझदारी देखेर मानिसहरू अचम्ममा परेका छन्। सामाजिक सञ्जालमा कतिपय त्यति सानो कुरा के मागेको भन्दै सरकारको आलोचना गरेका छन्। कतिले रेल ल्याउँछु भनेर त्रिपाल मागिएको भन्दै व्यंग्य कसेका छन्।
चिनियाँ विदेश मन्त्रीसँग नेपालले के-के कुरा गर्यो, र उनको भ्रमणको के उपलब्धी भयो त? हामीले यी प्रश्न सोमबारको वार्तामा नेपालको नेतृत्व गरेका परराष्ट्र मन्त्री ज्ञवालीलाई सोध्यौं।
ज्ञवालीले चिनियाँ विदेश मन्त्रीसँग बृहत आर्थिक विकासका सम्बन्धमा गम्भीर कुराकानी भएको बताए।
‘सम्बन्धमा त हाम्रो केही समस्या छैन त्यसैले कनेक्टिभिटी कसरी बढाउन सकिन्छ भन्नेमा वार्ता केन्द्रीत भयो,’ ज्ञवालीले भने,‘रेल हाम्रो प्राथमिकता हो। त्यसमा हामी प्रतिवद्ध छौं। उहाँहरूले उक्त प्रतिवद्धताबारे आफूहरू जानकार रहेको बताउनुभयो। तर प्राविधिक रूपले निकै कठिन भएकाले त्यसलाई कसरी बनाउने,कुन फन्डिङ मोडलमा जाने भन्ने टुंगिन बाँकी छ।’
ज्ञवालीले चिनियाँ राष्ट्रपति सी चिनफिङको भ्रमणबारे पनि कुराकानी भएको बताए।
‘हामीले उच्चस्तरीय भ्रमणको अपेक्षा राखेको कुरा भन्यौं। उहाँहरूले उपर्युक्त समयमा भ्रमण हुने बताउनुभयो। यद्यपी मिति तय भएको छैन। भए पनि त्यसलाई सार्वजनिक गर्ने आफ्नै प्रक्रिया हुन्छन्,’ ज्ञवालीले भने।
उनले चीनको बेल्ट एन्ड रोड इनिसिएटिभ्सअन्तर्गत मदन भण्डारी विश्वविद्यालय बनाउनेलगायत विषयमा पनि छलफल भएको बताए।
‘विश्वविद्यालय पनि बनाउनु पर्छ। होइन विश्वविद्यालय हामीलाई चाहिँदैन भन्ने सोच छ भने त के भन्नु,’ ज्ञवालीले भने।
अनि त्रिपाल दिने समझदारी?
‘त्यो त सामान्य कुरा हो। चीनले भूकम्प आउँदा दिएका त्रिपालले अहिलेसम्म धानिरहेका छन्। हामीले मागेको होइन मानवीय हिसाबले उहाँहरूले दिएको सहयोग लिन्नौं भन्न मिल्दैन,’ ज्ञवालीले भने।
उनले यीको भ्रमणपछि आफूहरू चिनियाँ राष्ट्रपति नेपाल आउनेमा आशावादी भएको बताए।
‘सबै कुराका आफ्ना प्रक्रिया हुन्छन्। अहिले भएका कुरा पनि उच्च राजनीतिक भ्रमणको वातावरण बनाउन भएका हुन सक्छन्,’ ज्ञवालीले भने,‘यो भ्रमणपछि चिनियाँ राष्ट्रपति आउनेमा हामी आशावादी भएका छौं।’
