नेपाल कम्युनिष्ट पार्टी (नेकपा) को सचिवालय बैठक अहिले जारी छ।
प्रधानमन्त्री निवास बालुवाटारमा भइरहेको बैठकमा पार्टी एकता प्रक्रियाका बाँकी कामबारे छलफल भएको छ।
सचिवालयको आजको बैठक अघिल्ला बैठकभन्दा केही फरक देखिएको प्रधानमन्त्री निवासनिकट स्रोतले जनाएको छ।
यसअघि नेकपा सचिवालयका सबै बैठक प्रधानमन्त्री निवास बालुवाटारको मुख्य भवनको तल्लो तलामा बस्दै आएको थियो।
‘तर आज भने माथिल्लो तलामा बैठक बसिरहेको छ,’ प्रधानमन्त्रीको निजी सचिवालयका एक सदस्यले सेतोपाटीसँग भने।
प्रधानमन्त्री निवासको माथिल्लो तलामा रहेको सो कोठामा सामान्यतया बैठकहरु बस्ने गर्दैनथ्यो।
प्रधानमन्त्री केपी शर्मा ओली आज बिहानमात्र महाराजगञ्जस्थित मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा स्वास्थ्य जाँच गराउन गएका थिए। उनको मुटुमा राखिएको नली निकालिएको थियो। उक्त नलीलाई क्याथेटर भनिन्छ।
यस्तै नेकपा सचिवालयको आजको बैठकमा सचिवालय सदस्य वामदेव गौतम भने उपस्थित छैनन्। उनी भाइरल ज्वरोका कारण आजको बैठकमा उपस्थित हुन नसकेका हुन्।
आजको बैठकले छ वटा महानगर, प्रवास कमिटी र आयोगहरुको टुंगो लगाउन सक्ने सम्भावना छ।
नेकपाका नेताहरूबीच भएको अनौपचारिक सहमतिअनुसार छ महानगरमध्ये काठमाडौं, विराटनगर, पोखरा, भरतपुर पूर्वएमाले ललितपुर र वीरगञ्ज महानगरपालिकाको नेतृत्व पूर्वमाओवादीको भागमा पर्ने सम्भावना छ।
यस्तै प्रवास कमिटीको इन्चार्ज केन्द्रीय सदस्य विन्दा पाण्डे र सहइन्चार्जको जिम्मेवारी केन्द्रीय सदस्यहरू युवराज कार्की र युवराज चौलागाईंलाई दिने तयारी नेकपा नेतृत्वको छ।
आजैको बैठकले केन्द्रीय अनुशासन आयोग, केन्द्रीय लेखा परीक्षण आयोग र केन्द्रीय निर्वाचन आयोगको नेतृत्व पनि टुंगो लगाउनेछ।
प्रधानमन्त्री केपी शर्मा ओली सिंगापुरमा उपचार गरेर फर्किएपछि पहिलो पटक नेकपा सचिवालय बैठक बस्न लागेको हो।
प्रधानमन्त्री सिंगापुर जानुअघि भएको सचिवालय बैठकमा बरिष्ठ नेता माधवकुमार नेपाल र अध्यक्ष ओलीबीच बाझाबाझ भएको थियो।
प्रधानमन्त्री ओली भदौ ५ गते सिंगापुर गएका थिए। ओली नहुँदा अर्का अध्यक्ष दाहालले पार्टी कार्यालय धुम्बाराहीमा सचिवालय बैठक राखेका थिए।
