नेपाल कम्युनिष्ट पार्टी र चिनियाँ कम्युनिष्ट पार्टीबीच काठमाडौंमा हुन लागेको दुई दिने अन्तरक्रिया कम्युनिष्ट पार्टीमा अनुशासन कसरी लागू गर्ने भन्नेबारे पनि एउटा छुट्टै सत्र राखिएको छ।
‘पार्टी अनुशासनको व्यापक कार्यान्वयन’ शीर्षक दिएको सो सत्रमा चिनियाँ कम्युनिष्ट पार्टीको संगठन विभागका प्रतिनिधि सु नान पेङले कार्यपत्र पेस गर्नेछन्। उनले चिनियाँ कम्युनिष्ट पार्टी आफ्ना करोडौं कार्यकर्तालाई कसरी अनुशासनमा राख्छ, पार्टी मेसिनरी कसरी सञ्चालित हुन्छ भन्ने चर्चा गर्नेछन्।
उक्त सत्र मंगलबार बिहान १० बजे देखि ११:३० सम्म डेढ घन्टा चल्नेछ।
चिनियाँ कम्युनिष्ट पार्टी कठोर अनुशासनमा चल्ने गर्छ। नेतृत्व तहबाट आएका विचार र रणनीति जनतासम्म पुर्याउने काम पार्टीका कार्यकर्ताले नै गर्छन्।
चिनियाँ समाजमा कम्युनिष्ट पार्टीको एकलौटी वर्चश्व छ। चीनमा अरू पार्टीको अस्तित्व छैन।
नेपाल भने बहुलवादी समाज हो। यहाँ धेरै पार्टीहरू छन्।
खुला समाज र लोकतान्त्रिक प्रणालीमा प्रतिस्पर्धा गर्नुपर्ने भएकाले नेपाल कम्युनिष्ट पार्टीभित्र चिनियाँ कम्युनिष्ट पार्टीजस्तो कठोर अनुशासन छैन। बरू नेताहरू बारम्बार पार्टी र कार्यकर्ता अनुशासनहीन भएको टिप्पणी गर्ने गर्छन्।
केही दिनअघि ललितपुरमा एउटा कार्यक्रममा बोल्दै अध्यक्ष प्रचण्डले ‘हामी हिजो निक्कै अनुशासित थियौं र मात्रै यहाँ आइपुगेका हौं। आजभोलि अनुशासनको स्तर गिरेर जसलाई जे मन लाग्यो, त्यही बोल्ने भएका छौं। यसलाई सच्याउने ऐतिहासिक जिम्मेवारी हाम्रो काँधमा छ।’
दुई पार्टीबीचको अन्तरक्रिया सोमबार साँझदेखि सुरू हुँदैछ।
अन्तरक्रियाको प्रधानमन्त्री तथा नेकपाका अध्यक्ष केपी ओलीले उद्घाटन गर्ने कार्यक्रम छ। पार्टीका अर्का अध्यक्ष प्रचण्डले पनि आजै साँझ सम्बोधन गर्नेछन्।
चिनियाँ कम्युनिष्ट पार्टीका विदेश विभाग प्रमुख सङ ताओले पनि आज अन्तरक्रियालाई प्रमुख वक्ताको रूपमा सम्बोधन गर्नेछन्।
प्रचण्डले नेकपाको नीति तथा कार्यक्रम, नेपालको संविधानलगायतका विषयमा बोल्ने नेकपाको स्कुल विभागका उपाध्यक्ष देवेन्द्र पौडेलले बताए।
सोमबार साँझ हुने पहिलो सेसनमा चिनियाँ कम्युनिष्ट पार्टीको स्कुल विभागका प्रतिनिधि साओ लीले ‘मध्यम आयको चिनियाँ समाज’ निर्माण गर्नेबारे बोल्नेछन्।
२०३५ सम्ममा चीनले मध्यम आयको समाज निर्माण गर्ने लक्ष्य लिएको छ। त्यसबाट अघि बढ्दै सन् २०५० सम्म समुन्नत समाजवादी समाज निर्माण गर्ने र विश्वको सबैभन्दा शक्तिशाली मुलुक बन्ने चीनको लक्ष्य छ।
मंगलबार हुने दोस्रो सत्र भने चिनियाँ सुधारका कार्यक्रम कसरी अघि बढाउने भन्नेबारे छ। त्यो सत्रमा चिनियाँ कम्युनिष्ट पार्टीका स्कुल विभाग प्रतिनिधि छिङ याङले आफ्ना कार्यपत्र पेश गर्नेछन्।
मंगलबारको तेस्रो सेसन भने बेल्ट एण्ड रोड इनिसियटिभ (बीआरआई) बारे हुनेछ। त्यसमा राष्ट्रिय विकास तथा पुनर्संरचना परिषदका सदस्य सी यू लङले कार्यपत्र प्रस्तुत गर्नेछन्।
नेकपाका स्कुल विभाग प्रमुख ईश्वर पोखरेलले दुई दिने अन्तरक्रिया अध्यक्षता गर्नेछन्। अन्तरक्रियामा नेकपामा केन्द्रीय सदस्य र बुद्धिजीवी गरी २ सय जनाको सहभागिता हुनेछ।
