राष्ट्रपति विद्यादेवी भण्डारीको निमन्त्रणामा चिनियाँ राष्ट्रपति सी चिनफिङ दुई दिने नेपालको राजकीय भ्रमणमा शनिबार काठमाडौंमा उत्रिए।
उनलाई विमानस्थलमै राष्ट्रपति विद्यादेवी भण्डारीले स्वागत गरिन्।
सीको स्वागतको लागि प्रधानमन्त्री केपी शर्मा ओली, राष्ट्रिय सभाका अध्यक्ष गणेशप्रसाद तिमिल्सेना, मन्त्रीहरू पनि विमानस्थल पुगेका थिए।
राष्ट्रपति सीलाई नेपाली सेनाले विमानस्थलमै गार्ड अफ अनर दिएको थियो।
त्यसपछि राष्ट्रपति सी विमानस्थलबाट सोझै होटल सोल्टी गए। केहीबेर आराम गरी उनी राष्ट्रपति निवास शितलनिवास प्रस्थान गरे। शितल निवासमा राष्ट्रपति भण्डारी र सीबीच झन्डै ४० मिनेट कुराकानी भयो।
भेटमा रेलदेखि भ्रमण वर्षबारे छलफल भयो।
भेटवार्ता सकिएपछि दुवै राष्ट्रपति सीको सम्मानमा भण्डारीले सोल्टी होटलमा आयोजना गरेको रात्रीभोजमा सहभागी भए।
सोल्टी होटलमा आयोजित रात्रीभोजलाई सम्बोधन गर्दै चिनियाँ राष्ट्रपति सी चिनफिङले नेपाल–चीन रेलमार्गको सम्भाव्यता अध्ययन गर्ने घोषणा गरे।
दुई देशबीच बहुआयामिक 'कनेक्टिभिटी' सञ्जाल निर्माण गर्न बढीभन्दा बढी नाका खोलेर सञ्चालनमा ल्याउने प्रतिबद्धता पनि उनले व्यक्त गरे।
यसैगरी शनिबार साँझै सोल्टी होटलमा प्रमुख प्रतिपक्षी दल नेपाली कांग्रेसका सभापति शेरबहादुर देउवासँग भएको भेटका क्रममा सीले नेपाल र चीन धेरै पहिलादेखि नै मैत्रीपूर्ण छिमेकी, असल दाजुभाइ र साथी भएको र भविष्यमा स्थायी र मैत्रीपूर्ण सम्बन्ध कायम राख्ने बताए।
चिनियाँ राष्ट्रपति सी चिनफिङसँग सत्तारूढ नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डको नेतृत्वमा सचिवालय सदस्यहरूले आइतबार बिहान भेटवार्ता गरे।
चिनियाँ राष्ट्रपति सी चिनफिङ नेतृत्व प्रतिनिधि मण्डल र प्रधानमन्त्री केपी शर्मा ओली नेतृत्वको नेपाली प्रतिनिधि मण्डलबीच दुई पक्षीय औपचारिक वार्ता भएको छ।
नेपाल र चीनबीच १८ समझदारी र २ लेटर अफ एक्सचेन्जमा हस्ताक्षर भएको छ। प्रधानमन्त्री केपी शर्मा ओली र चिनियाँ राष्ट्रपति सी चिनफिङको उपस्थितिमा आइतबार ती समझदारीमा हस्ताक्षर भएको हो।
हस्ताक्षरपछि ती समझदारीपत्र दुबै देशका परराष्ट्रमन्त्री, अर्थसचिव, गृह, परराष्ट्रसचिवलगायत सम्बन्धित मन्त्रालयका सचिव एवं नेपालका लागि चिनियाँ राजदूतले आदानप्रदान पनि गरे।
सी आजै स्वदेश फर्किएका छन्।
पछिल्लो २३ वर्षमा नेपालको राजकीय भ्रमण गर्ने सी पहिलो चिनियाँ राष्ट्रपति हुन्। यसअघि सन् १९९६ मा चिनियाँ राष्ट्रपति जियाङ जेमिनले नेपालको राजकीय भ्रमण गरेका थिए।
हेर्नुस्, सी काठमाडौं आएदेखि फर्किएसम्मका ४१ तस्बिर
तस्बिरहरू : सेतोपाटी/रासस