नेपाली कांग्रेसका सभापति शेरबहादुर देउवाले भातृ संस्था नेपाल विद्यार्थी संघमा तदर्थ समिति गठन गर्ने तयारी गरेका छन्।
नेविसंघको ११ औं महाधिवेशन गराउनका लागि तदर्थ समिति गठन गर्न सभापति देउवाले बरिष्ठ नेता रामचन्द्र पौडेलसँग छलफल गरेका थिए। पार्टीले ३२ वर्ष उमेरहद काटेकालाई तदर्थ समितिको नेतृत्वमा ल्याउन लागेपछि नेविसंघले भने विरोध गरेको छ।
सभापति देउवाले सुनसरीका राजिव ढुंगानालाई तदर्थ समितिको सभापति बनाएर छ महिनाभित्र महाधिवेशन गर्ने जिम्मेवारी दिन लागेपछि नेविसंघका नेताहरूले भने विरोध गरेका छन्।
बुधबार काठमाडौंमा पत्रकार सम्मेलन गर्दै नेविसंघको एक समूहले ३२ वर्ष पूरा भएको व्यक्ति नेविसंघको सदस्य हुन नपाउने विधान कार्यान्वयन हुनुपर्ने बताएको छ। विधानअनुसार ४० जिल्लामा अधिवेशन सकिएको र २१ जिल्लामा अधिवेशन उन्मुख रहेको विधान पक्षधरका विद्यार्थीहरूले बताएका छन्।
नेविसंघ नेता मनिष सिंखडाका अनुसार विधानअनुसार ३२ वर्ष मुनिकालाई नेविसंघ तदर्थ समितिमा नल्याए पार्टी कार्यालयमा अनशन बस्ने तयारी छ। ‘नेविसंघलाई बृद्ध संघ बनाउन लागिएको छ। विधान उलंघन गरे पार्टी कार्यालयमा अनशन बस्छौं,’ उनले भने।
प्रकाशित मिति: बुधबार, कात्तिक ६, २०७६, ०५:१९:००
.JPG)
