लगातारको वर्षाले नदी तथा खोलाहरुमा पानीको वहाव बढ़न थालेपछि प्रदेश नम्बर दुईका अधिकांश जिल्लाहरु डुबानको उच्च जोखिममा देखिएका छन्।
बाढी पहिरोबाट हुन सक्ने जोखिम न्यूनीकरणका लागि तीनै सुरक्षा निकायलाई हाई अलर्टमा बस्न मुख्यमन्त्री लालबाबु राउतले निर्देशन दिएका छन्।
प्रदेश दुईको मुख्यमन्त्री तथा मन्त्रिपरिषदको कार्यालयमा शुक्रवार सम्पन्न विपद व्यवस्थापन समितिको बैठकमा मुख्यमन्त्री राउतले प्रदेशको आठ वटै जिल्ला बाढीको उच्च जोखिममा रहेकोले जोखिम न्यूनीकरणका लागि तयारी अवस्थामा बस्न निर्देशन दिएका हुन्।
जोखिम न्यूनीकरणको लागि आवश्यक सामग्रीहरुको तत्काल आपूर्ति गर्न समेत मुख्यमन्त्री राउतले सम्बन्धित मन्त्रालय र निकायहरुलाई निर्देशन दिएका छन्। बैठकमा जनप्रतिनिधिसहित सुरक्षा निकायका पदाधिकारीहरुको उपस्थिति थियो।
गत वर्ष वर्षाको कारण प्रदेश २ का सबै जिल्लाहरु डुबानमा पर्दा ३५ जना भन्दा बढी व्यक्तिको मृत्यु भएको थियो।
अत्याधिक वर्षाकै कारण कृषि क्षेत्रमा करिब अढ़ाई अर्बको क्षति भएको थियो ।
प्रकाशित मिति: शुक्रबार, असार २६, २०७७, १६:०५:००
