उपप्रधानमन्त्री तथा सहरी विकास मन्त्री राजेन्द्र महतोको अभिव्यक्तिप्रति ७ विद्यार्थी संगठनले प्रधानमन्त्री केपी शर्मा ओलीको स्पष्टीकरण माग गरेका छन्।
उपप्रधानमन्त्री महतोको अभिव्यक्तिले उनको व्यक्तिगत धारणा मात्रै जनाउँदैन, ओली सरकारको निरंकुश, स्वेच्छाचारी र विदेशमुखी प्रवृत्तिको उजागर गर्दछ। प्रधानमन्त्री केपी ओलीसँग महतोको अभिव्यक्तिबारेमा स्पष्टीकरण माग गर्दछौं,’ भर्चुअल बैठकपछि आइतबार विद्यार्थी संगठनहरूले संयुक्त रूपमा जारी गरेको विज्ञप्तिमा उल्लेख छ।
मन्त्री भएलगत्तै शुक्रबार कार्यभार सम्हाल्दै महतोले बहुल राज्यको कुरा उठाएका थिए। मन्त्री महतोको भनाइलाई लिएर चौतर्फी आलोचना भएको थियो। गए राति मन्त्री महतोले प्रेस विज्ञप्ति निकालेर आफ्ना भनाइ बङ्ग्याएर र गलत अर्थ लाग्ने गरी प्रचारप्रसार भएकोमा ध्यानाकर्षण भएको उल्लेख गरेका छन्। उनले आफू अखण्डता र एकताप्रति पूर्ण प्रतिवद्ध रहेको उल्लेख गरेका थिए।
यो पनि: राष्ट्रिय एकता, अखण्डताप्रति पूर्ण प्रतिवद्ध छु: उपप्रधानमन्त्री महतो
साथै विद्यार्थी संगठनहरूले नदीजन्य पदार्थ उत्खनन् तथा निकासीबारे बजेटमा समेटिएको कार्यक्रमको विरोध गरेका छन्।
पेट्रोलियम पदार्थमा गरिएको मूल्यवृद्धि फिर्ता लिन माग गर्दै उनीहरूले झापाको बिएन्सी मेडिकल कलेजलाई दिइएको सम्बन्धन तत्काल खारेज गर्न पनि माग गरेका छन्।
यस्तै त्रिवि र अन्य विश्वविद्यालयहरूले उचित मापदण्ड बनाएर स्थगित भइरहेका परीक्षा गर्नुपर्ने माग उनीहरूको छ।
विज्ञप्तिमा नेविसंघ अध्यक्ष राजिव ढुंगाना, अखिल (क्रान्तिकारी)का अध्यक्ष रञ्जित तामाङ, अनेरास्ववियुका अध्यक्ष सुदेश पराजुली, (अखिल क्रान्तिकारी) का अध्यक्ष हरिकृष्ण गजुरेल, अखिल (क्रान्तिकारी) का अध्यक्ष चिरञ्जीवि ढकाल, अखिल (पाँचौं) का अध्यक्ष घनश्याम मिश्र, अखिल (छैटौं)का अध्यक्ष विमल पोखरेलले हस्ताक्षर गरेका छन्।
