प्रमुख प्रतिपक्षी नेपाली कांग्रेसले सरकारका नीति तथा कार्यक्रम प्रस्तुत गर्न दिने र त्यसपछि बस्ने बैठक भने अवरोध गर्ने बताएको छ।
मंगलबार अपराह्न ३ बजे संघीय संसदको संयुक्त बैठकमा राष्ट्रपति रामचन्द्र पौडेलले सरकारका नीति तथा कार्यक्रम प्रस्तुत गर्दैछन्।
लगत्तै प्रतिनिधि सभा र राष्ट्रिय सभामा बैठक बस्नेछ।
उक्त बैठक दुवै सदनमा अवरोध गर्ने कांग्रेसको भनाइ छ।
सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै कांग्रेसले संसदीय छानबिन समिति गठनको माग गर्दै आएको थियो।
कांग्रेसले अहिलेसम्म प्रतिनिधि सभामा मात्रै अवरोध गर्दै आएकोमा मंगलबारदेखि राष्ट्रिय सभा पनि अवरोध गर्ने भएको छ।
राष्ट्रिय सभामा कांग्रेस संसदीय दल नेता रहेका कृष्णप्रसाद सिटौलाले अध्यक्ष नारायणप्रसाद दाहालसँग नीति तथा कार्यक्रम पेस गर्दा अवरोध नगर्ने र त्यसपछि बैठक अवरोध गर्ने जानकारी गराएका हुन्।
‘संयुक्त बैठकमा सरकारको नीति तथा कार्यक्रम प्रस्तुत हुँदा हामी अवरोध गर्दैनौं,’ सिटौलाले भने, ‘धन्यवाद प्रस्तावका लागि बस्ने राष्ट्रिय सभा बैठकमा हाम्रो अवरोध रहन्छ। यो हाम्रो पार्टीको निर्णय हो।’
राष्ट्रिय सभा अध्यक्ष दाहालले राष्ट्रिय सभामा प्रतिनिधित्व गर्ने राजनीतिक दलका नेताहरूसँग संसद भवन बानेश्वरमा मंगलबार दिउँसो छलफल गरेका थिए।
छलफलमा सरकारको नीति तथा कार्यक्रमको संयुक्त बैठक र त्यसपछिको राष्ट्रिय सभाको बैठक सञ्चालन गर्नेबारे कुराकानी भएको थियो।
‘राष्ट्रिय सभाको गरिमा, पहिचान स्थापित गर्नका लागि तल्लो सदनको विवाद माथिल्लो सदनमा ल्याउनु राम्रो हुँदैन। हामी आफैँ निर्णय गर्न सक्छौं भन्ने सन्देश दिन जरूरी छ,’ उनले भने, ‘प्रतिनिधि सभामा हुने सहमति/असहमति उहाँहरूले उतै मिलाउनु हुन्छ। हामी परिपक्व र विज्ञ सभाका सदस्यहरूले हाम्रो परिपक्वता देखाउने यस्तै अवस्थामा हो। त्यसैले बैठक सुचारू गर्न प्रतिपक्षमा रहनुभएका माननीयज्यूहरूले सहयोग गर्नुहोस्।’
यो पनि: सभामुखलाई कांग्रेसले भन्यो- नीति तथा कार्यक्रम बाचन सकेलगत्तै बैठक अवरोध गर्छौं