सरकारले सेवासुविधा थप लगायत माग गर्दै आन्दोलनरत संसद सचिवालयका कर्मचारीसँग वार्ता सुरू गरेको छ।
सोमबार काठमाडौंको बानेश्वरस्थित संसद भवनमा संसद सचिवालयका कर्मचारी युनियनका प्रतिनिधिसँग कानुन मन्त्री पदम गिरीको नेतृत्वको समितिबीच छलफल चलिरहेको हो।
अहिले युनियनका प्रतिनिधिसँग संसद सचिवालयका महासचिव पद्मप्रसाद पाण्डेय, राष्ट्रिय सभा सचिव सुरेन्द्र अर्याल, नेकपा एमाले सचेतक सुनिता बराल बैठकमा सहभागी छन्।
आइतबार बिहान मात्रै प्रधानमन्त्रीको सरकारी निवास बालुवाटारमा बसेको बैठकले गिरी नेतृत्वको समिति बनाएको थियो।
प्रधानमन्त्री पुष्पकमल दाहाल प्रचण्ड, सभामुख देवराज घिमिरे, राष्ट्रियसभा अध्यक्ष नारायणप्रसाद दाहाल, अर्थमन्त्री वर्षमान पुन लगायत नेताहरूको बैठकले कर्मचारीको मागबारे सहजीकरणका लागि समिति बनाएको थियो।
समितिमा संघीय संसद सचिवालयका महासचिव पद्मप्रसाद पाण्डेय र अर्थसचिव मधुकुमार मरासिनी सदस्य थिए।
अतिरिक्त समयमा काम गरेको पारिश्रमिक नपाएको भन्दै संघीय संसदका कर्मचारीहरू विभिन्न ११ बुँदे मागसहित आन्दोलनमा छन्।
