नेपाली कांग्रेसका सांसद तेजुलाल चौधरीले गणित, विज्ञान र अंग्रेजी शिक्षकको विशेष व्यवस्था गर्न सरकारसँग माग गरेका छन्।
शुक्रबार प्रतिनिधि सभा बैठकको आकस्मिक समयमा बोल्दै सांसद चौधरीले विद्यालयहरूमा गणित र विज्ञान शिक्षक पाउन छोडिसकेको बताए।
उनले एसइईको नतिजामा पनि सबैभन्दा बढी गणित विषयमा विद्यार्थी अनुत्तिर्ण भएको भन्दै गणित, विज्ञान र अंग्रेजी शिक्षकको विशेष रुपले व्यवस्था गर्नुपर्ने बताएका हुन्।
उनले कक्षा १ मा भर्ना भएका विद्यार्थीहरू कक्षा १० सम्म आइपुग्दा संख्या घटेको पनि उनले बताए।
‘कक्षा १ मा विद्यार्थी भर्ना हुँदा ११/१२ लाख हुन्छन्। एसइईसम्म आउँदाखेरी ५ लाख हुन्छ। एक त सात लाख विद्यार्थीहरु बाटोमै हराएका हुन्छन्,’ उनले भने, ‘अहिले आएर सबैभन्दा बढी गणित विषयमा १ लाख ७७ हजार फेल भएका छन्। नेपालमा धेरैजसो गणित र विज्ञान शिक्षक स्कुलमा पाउन छोडिसकेको छ। म सरकारसँग जोडदार माग गर्न चाहन्छु, साँच्चै शिक्षालाई सुधार गर्ने हो भने गणित, विज्ञान र अंग्रेजी शिक्षकको विशेष व्यवस्था गर्न जोडदार माग गर्न चाहन्छु।’
उनले प्राकृतिक विपत्तिबाट धेरै जनधनको क्षति हुन थालिसकेको भन्दै यसतर्फ पनि सरकारको ध्यानाकर्षण गराए।
-न्युज एजेन्सी नेपाल
