नेपाली कांग्रेसकी सांसद प्रतिमा गौतमले काठमाडौंको शंखरापुर लप्सीफेदीका जनप्रतिनिधिहरू र आन्दोलनरत पक्षसँग वार्ता गर्न सरकारसँग माग गरेकी छन्।
शुक्रबारको प्रतिनिधि सभामा बोल्दै उनले विद्युत सवशस्टेशन निर्माणका विषयमा जनप्रतिनिधि र आन्दोलनरत पक्षसँग वार्ता गर्नुपर्ने बताइन्।
आफूले पटकपटक त्यस क्षेत्रका स्थानीयसँग कुराकानी गर्न सरकारको ध्यानाकर्षण गर्दै आएको उनको भनाइ छ।
‘प्रशस्त विकल्पहरू हुँदाहुँदै पनि मानव बस्तीबीचबाट लगिएको सवस्टेशनले त्यहाँका जनता उठिबास हुने अवस्थामा पुगेका छन्,’ उनले भनिन्, ‘राज्यले नै अन्याय गरेको महसुश त्यहाँका जनताहरूले गर्न थालेका छन्। आज प्रशासन र नागरिकविच भएको द्वन्द्वले त्यस क्षेत्र रणभूमिमा नै परिणत भइरहेको छ।’
उनले लप्सीफेदीका जनता विकास विरोधी नभएको पनि बताइन्। ‘तर राज्यको समन्वयात्मक व्यवहारको कमीले उनीहरूलाई विकास विरोधी जस्तो बनाउँदै गएको छ,’ उनले भनिन्, ‘जनताको भावनालाई बुझ्ने कोसिस नगरी बल प्रयोग गरीने विकास कार्यले जनतालाई कसरी राहत दिन सक्छ?’
उनले विकासलाई जनता स्वयमले आत्मसात् गर्न पाउनु पर्ने पनि बताइन्।
‘सरकारले जनताको आवाजलाई बेवास्ता गरी उम्कन हुँदैन। त्यस क्षेत्रका जनप्रतिनिधि र आन्दोलनकारीसँग गम्भीर रुपमा वार्ता गरी निकास निकाल्नुपर्छ,’ उनले भनिन्।
