प्रधानमन्त्री केपी शर्मा ओलीलाई लुम्बिनी प्रदेश सभाले प्रदेश सभा बैठकमा विशेष सम्बोधनका लागि निम्ता पठाइएको छ।
फागुन ५ गते प्रधानमन्त्री ओली दाङको घोराहीमा आउने कार्यक्रम यसअघि नै तय भइसकेको थियो। सोही दिन सोमबार बस्ने प्रदेश सभाको बैठकमा विशेष सम्बोधनका लागि प्रधानमन्त्री ओलीलाई निमन्त्रणा गरिएको हो।
लुम्बिनीका मुख्यमन्त्री चेतनारायण आचार्यबाट शुक्रबार बिहान सभामुख तुलाराम घर्ती मगरले प्रधानमन्त्री ओलीलाई विशेष सम्बोधनका लागि पठाइएको निमन्त्रणा पत्र बुझेका थिए। त्यसपछि लुम्बिनी प्रदेश सभाले उक्त पत्र प्रधानमन्त्री कार्यालयमा इमेल गरिसकेको छ।
स्रोतका अनुसार प्रधानमन्त्री ओलीसँग मुख्यमन्त्रीले सल्लाह गरेरै औपचारिकताका लागि सभामुखमार्फत् पत्र पठाएका हुन्।
लुम्बिनी प्रदेश सभा नियमावली, २०७९ को नियम २२० को उपनियम ९२० बमोजिम निमन्त्रणा गरिएको मुख्यमन्त्रीको सचिवालयले जानकारी दिएको छ।
नेकपा (एमाले) नेताहरूले फागुन ५ गते प्रदेश सभाको बैठकलाई विशेष सम्बोधनपछि प्रधानमन्त्री ओली घोराहीमा आयोजना गरिएको सभालाई सम्बोधन गर्न आइपुग्ने कार्यतालिका बनेको एक नेताले बताए।
प्रधानमन्त्री ओली फागुन ६ गते राप्ती स्वास्थ्य विज्ञान प्रतिष्ठानको सिनेट बैठकमा सहभागी हुने कार्यक्रम छ।
