प्रधानमन्त्री केपी शर्मा ओलीले संघीयताले विकासको ढोका खोलेको र तीनै तहका सरकारबीच सहकार्य आवश्यक रहेको बताएका छन्।
आज लुम्बिनी प्रदेशसभा बैठकलाई सम्बोधन गर्दै प्रधानमन्त्री ओलीले संघीयताले विकास सम्भव छ भन्ने उदाहरण लुम्बिनी प्रदेशले प्रस्तुत गरिरहेको बताए।
'करिब ७/८ वर्षभित्र राजधानी कसरी निर्माण गर्न सकिन्छ। आफ्नै सभाहलमा कसरी सभा गर्न सकिन्छ। आफ्नै मुख्यमन्त्री कार्यलय, सभामुख निवास,सभामुखको कार्यालय, मन्त्रीहरूको कार्यालयदेखि यावत संरचना निर्माण गर्न कसरी सकिन्छ भन्ने दृष्टान्त दिएको छ।राजधानीमात्रै विकास गरेको छैन। कसैले विश्वास नगरेको ठाउँमा राजधानी स्थापना भएको छ,' उनले भने।
प्रधानमन्त्री ओलीले राजधानी बनाउनमात्रै प्रदेश सरकार केन्द्रीत नभएको पनि बताए।
'यसबीचमा यसले यातायातको सन्दर्भमा धेरै पुल बनेका छन्। बाटा बनेका छन्। बनेका बाटा चौडा बनेका छन्। भव्य ढंगले अन्तर्राष्ट्रिय विमानस्थल बनेका छन्,' उनले भने।
प्रधानमन्त्री ओलीले संघीयता कार्यान्वयनका क्रममा देखिएका चुनौतीहरुलाई पार गर्न तीनै तहका सरकारबीच समन्वय र सहकार्य अपरिहार्य रहेको बताए।
‘हामी सबैले मिलेर मात्र समृद्ध नेपाल, सुखी नेपालीको सपना साकार पार्न सक्छौं, उनले भने।
साथै उनले प्रदेशहरुले कानूनी संरचना निर्माण गर्दा संघीय सरकारद्वारा स्थापित मौजूदा कानूनहरुलाई आधार मानेर अघि बढ्नुपर्नेमा जोड दिए।
‘संघ सरकारले बनाएका मौजूदा कानूनमा टेकेर प्रदेशहरुले विकास गर्नुपर्छ,’ उनले भने।
‘प्रदेशहरूले आफैं कानून बनाउँदा धेरै कानून संशोधन गर्नुपर्ने अवस्था आउन सक्छ, त्यसैले मौजूदा कानूनहरूलाई आधार मानेर अघि बढ्न आग्रह गर्दछु,' प्रधानमन्त्री ओलीले भने।
प्रधानमन्त्री ओलीले पवित्र भूमि लुम्बिनीमा उपस्थित हुन पाउँदा आफुलाई खुसी लागेको बताउँदै भगवान गौतम बुद्धको जन्मस्थल तथा अन्य ऐतिहासिक र धार्मिक स्थलहरूले लुम्बिनी प्रदेशलाई विशेष बनाएको उल्लेख गरे।
प्रधानमन्त्री ओलीले लुम्बिनी प्रदेश प्राकृतिक, सांस्कृतिक तथा आर्थिक रुपमा समृद्ध बन्दै गएको र यहाँको राजधानी सफलतापूर्वक कार्यान्वयनमा आएको बताए।
भैरहवामा हालै निर्माण सम्पन्न भएको अन्तर्राष्ट्रिय विमानस्थल, फराकिलो सडक, तथा पूर्वाधार विकासलाई प्रदेशको प्रगतिको सूचकको रुपमा व्याख्या गर्दै प्रधानमन्त्री ओलीले सिद्धबाबा सुरुङ, रामपुर–कपुरकोट लगायतका योजनाहरुले यातायात सहज बनाउने बताए।
प्रधानमन्त्री ओलीले लुम्बिनी प्रदेशलाई कृषि, पर्यटन, र औद्योगिक केन्द्रका रुपमा अघि बढाउने योजनाबारे चर्चा गर्दै, मानव–केन्द्रित विकासलाई प्राथमिकता दिनुपर्नेमा जोड दिए।
‘यदि मानव जीवन छैन भने विकासको कुनै अर्थ रहँदैन, उनले भने।
सिंचाइ आयोजना सफल बनाउँदै कृषिलाई प्रबर्द्धन गर्नुपर्ने र वातावरण संरक्षणसँगै विकासका कार्यहरू अघि बढ्नुपर्नेमा उनले जोड दिए। प्रदेशको समग्र विकासका लागि केन्द्र सरकार प्रतिबद्ध रहेको प्रधानमन्त्री ओलीले स्पष्ट पारे।
सम्बोधनका क्रममा प्रधानमन्त्री ओलीले प्रदेश सरकारले १२ सय शैयाको लुम्बिनी प्रादेशिक अस्पतालको भवन निर्माण सुरु गरेकोमा प्रशंसा गर्दै सबै तहका सरकार मिलेर नागरिकको स्वास्थ्य सेवालाई सहज र सुलभ बनाउनुपर्ने बताए।
‘हामीले मिलेर स्वास्थ्य संस्थाहरूलाई प्रभावकारी रुपमा सञ्चालन गर्नुपर्छ, प्रधानमन्त्री ओलीले भने, ‘सहकार्यबाट मात्र नागरिकलाई गुणस्तरीय स्वास्थ्य सेवा प्रदान गर्न सकिन्छ,।
प्रधानमन्त्री ओलीले प्रविधिको सही सदुपयोगमा पनि जोड दिए।
‘मोबाइलमा गरेका कुरा गोप्य हुँदैनन्, अरुले बनाएको चिज हो डेटा अन्त जान्छ। प्रविधिको धेरै विकास भएको छ तर ठीक सदुपयोग गर्न सक्नुपर्छ, उनले भने।
