नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले कपोलकल्पित आरोप लगाएर नेपाली कांग्रेस र नेकपा (एमाले) ले ईन्दिरा रानामगरलाई उपसभामुखबाट हटाउन खोजेको आरोप लगाएका छन्।
कांग्रेस–एमालेले उपसभामुख रानामगरलाई आचरणको कारण देखाएर हटाउने तयारी गरेका छन्। त्यसका लागि संसदीय दलको कार्यालयमा सांसदहरूलाई हस्ताक्षर गराइरहेका छन्। उपसभामुख अमेरिका रहेकाले त्यहाँबाट फर्किएपछि हटाउने प्रस्ताव दर्ताको तयारीसमेत गरेका छन्।
अध्यक्ष प्रचण्डले कांग्रेस–एमालेले सरकार बनेयता नै गल्तीबाहेक केही नगरेको बताउँदै यो पनि त्यसैको निरन्तरता भएको बताए।
‘उपसभामुख हटाउने एटेम्प्ट त धेरै पहिलेदेखिको हो। तर त्यो, गलत गर्दै हुनुन्छ। गलत त उहाँहरूले गरी नै राख्नुभएको छ। यो सरकार बनेदेखि नै गल्तीबाहेक राम्रो काम त गरेकै छैन,’ उनले भने, ‘एउटा महिला, आदिवासी जनजाति महिला, सामाजिक सेवा, बालबालिकाको हेरचाह गर्नेमा राष्ट्रिय र अन्तर्राष्ट्रिय रूपमा ख्याती प्राप्त महिलालाई, अहिले अनाहकमा हटाउने जो कोसिस गर्नुभएको छ। गलत छ, यो। हामी यसको विरोधमा छौं।’
उपसभामुखले गल्ती गरेको केही प्रमाण नभएको उनले बताए। उपसभामुख रानाले अमेरिकी भिसाको समय सारिदिन आग्रह गर्दै लेखेको पत्र अघिल्लो साउनमा सार्वजनिक भएपछि उनीमाथि आचरणको प्रश्न उठेको थियो।
‘उहाँले केही गरेको भन्ने केही प्रमाण छैन, खाली कपोलकल्पित कुरा हो,’ प्रचण्डले भने।
-1746009348.jpg)
