सत्तापक्ष नेपाली कांग्रेसकी सांसद रमा कोइरालाले कुवेतमा नेपाली श्रमिकको मृत्यु भएको र गम्भीर बिरामी परेको घटनाबारे सदनलाई जानकारी गराउन माग गरेकी छन्।
बुधबार प्रतिनिधि सभामा बोल्दै सांसद कोइरालाले कुवेतमा १२ जना नेपालीको मृत्यु भएको र बिरामी भएर आइसियूमा उपचार भइरहेका नेपालीहरुको बारेमा श्रममन्त्रीले सदनलाई जानकारी गराउनुपर्ने माग राखेकी हुन्।
'१२ जनाको निधन भयो। केहि कामदार आइसियूमा हुनुहुन्छ। कसैको किड्नी फेल भएको कसैको आँखा बिग्रिएको। हिजोदेखि धरपकड गर्न सुरू भएको छ भन्ने सुनिएको छ,' उनले भनिन्, 'यत्रो ठूला घटना हुँदा हामी रेमिट्यान्स गन्न उद्वत छौं।'
उनले श्रमिकहरूलाई विदेश जानुअघि अभिमुखीकरणका नाममा जबरजस्ती पैसा असुल्ने गरेको तर कुन देशमा के गर्न हुन्छ/ हुँदैन भन्ने जानकारी नगराइएको बताइन्।
'पैसा लिएर श्रमिकलाई अभिमूखीकरण तालिमको सर्टिफिकेट काम लागेन। तालिम दिँदा कुवेतमा रक्सी सेवन गर्न पाइँदैन भनेर पठाउनुपर्छ कि पर्दैन?,' उनले भनिन्, 'बारम्बार भइरहेका छन्। सरकार के हेरेर बसेको छ। श्रम मन्त्रालय के हेरेर बसेको । मेनपावर कम्पनीले दिनानुदिन श्रमिकलाई ठगिरहँदा श्रम मन्त्रालय रमिता हेरेर बस्ने?'
उनले बिरामीका लागि सरकारले के-के गरिरहेको छ भन्ने जानकारी दिन पनि आग्रह गरिन्।
'श्रमिकहरूको लास कहिले आउँछ नेपाल? बिरामीहरूका लागि के गर्दैछ सरकारले त्यसको जानकारी हाम्रो सदनलाई दिनुपर्छ,' उनले भनिन्।
-1742801159.jpg)
-1746009348.jpg)
