नेकपा (माओवादी केन्द्र)ले मध्यपहाडी राजमार्गकेन्द्रीत अभियान भदौ २१ गतेदेखि पुनः सुरू गर्ने भएको छ।
पार्टी प्रवक्तासमेत रहेका उपाध्यक्ष अग्नी सापकोटाले भदौ २१ गतेदेखि लमजुङबाट अभियान सुरू हुने तय भएको जानकारी दिए।
अभियानकेन्द्रित कार्यक्रम लमजुङदेखि गोरखा, धादिङ हुँदै नुवाकोट पुग्नेछ।
लमजुङमा भदौ २१ र २२ गते बिहान, २२ गते दिउँसो र २३ गते गोरखा, २४ गते धादिङ र २५ गते नुवाकोटमा अभियान केन्द्रित कार्यक्रम हुनेछ।
अभियानमा विभिन्न स्थानहरूमा सभा, अन्तरक्रिया हुनेछ।अभियानमा अध्यक्ष, उपाध्यक्षहरू र महासचिव सहभागी हुनेछन्।
अध्यक्ष पुष्पकमल दाहाल 'प्रचण्ड'ले सबै जिल्लामा हुने सभालाई सम्बोधन गर्नेछन्।
'चार जिल्लामा कार्यक्रम गरेपछि बाँकी जिल्लाहरूको तय गरेअनुसार हुन्छ,' प्रवक्ता सापकोटाले भने।
माओवादी केन्द्रले गत जेठ २ गतेदेखि मध्यपहाडी राजमार्गकेन्द्रित अभियान सुरू गरेको थियो।
बैतडीबाट सुरू भएको अभियान बर्खाका कारण पोखरासम्म आइपुगेर रोकिएको थियो। वर्षाका कारण सडक अवरूद्धका घटना बढेपछि जेठ २१ गते अभियान स्थगित भएको थियो।
-1746009348.jpg)
