विद्यालय शिक्षा विधेयकका कतिपय व्यवस्थाप्रति असन्तुष्टि जनाउँदै परिमार्जनको माग गरी आन्दोलनमा रहेका निजी विद्यालय सञ्चालकहरूले शिक्षा, विज्ञान तथा प्रविधि मन्त्री रघुजी पन्तसँग भेटवार्ता गरेका छन्।
प्याब्सन, नेसनल प्याब्सन, हिसान, अपेन र एनएमएले शिक्षा विधेयकको विरोधमा सडक प्रदर्शनमा छन्। उनीहरूले आफ्ना माग सुनुवाइ नभए भदौ १८ गतेदेखि निजी विद्यालय बन्दको चेतावनी दिएका छन्।
यसैक्रममा निजी विद्यालय सञ्चालकहरूले शुक्रबार शिक्षामन्त्री पन्तसँग भेटेर कुराकानी गरेका हुन्।
उक्त भेटपछि प्याब्सनका पूर्वअध्यक्ष डिके ढुंगानाले मन्त्री पन्तसँग भेटवार्ताको तस्बिर सार्वजनिक गरेका छन्।
‘संयुक्त आन्दोलन समितिको तर्फबाट शिक्षामन्त्रीज्यूसँग छलफल आरम्भ, नेपालको निजी शैक्षिक क्षेत्रले पुर्याएको योगदान र यसको निरन्तरताको ग्यारेन्टी सम्बन्धमा गम्भीर बहस,’ उनले फेसकबुमा लेखेका छन्, ‘छलफललाई निरन्तरता दिने सहमति। हाम्रो आन्दोलन जारी छ।’
निजी विद्यालय सञ्चालकहरूले शिक्षा विधेयकमा रहेको निजी विद्यालय गैरनाफामूलक बनाउँदै जाने र विद्यार्थी संख्याका आधारमा १० देखि १५ प्रतिशतसम्म विद्यार्थीलाई पूर्ण छात्रवृत्ति दिने दुई मुख्य विषयको विरोध गर्दै आन्दोलन गर्दै आइरहेका छन्।
-1755241369.jpg)
-1746009348.jpg)
