रुपन्देहीको लुम्बिनी साँस्कृतिक नगरपालिकाको नगर प्रमुख सजरुद्दिन मुसलमानको निधन भएको छ।
लुम्बिनी साँस्कृतिक नगरपालिका वडा नम्बर ३ पडरिया निवासी मुसलमानको सनिवार बिहान ९ बजेतिर निधन भएको हो।
पछिल्लो केहि समयदेखि मुटुका रोगी रहेका मुसलमानको हृदयघातका कारण मृत्यु भएको नगरपालिकाका प्रमुख प्रशासकीय अधिकृत तारा ज्ञवालीले जानकारी दिइन्।
`एकातर्फ मुटुका रोगी र अर्कोतर्फ उहाँ केहि दिनदेखि मानसिक रुपमा समेत तनावमा हुनुहुन्थ्यो,’ उनले भनिन्।
मलेसियामा हप्ताको पारिवारिक भ्रमण गरी शुक्रबार मात्र लुम्बिनी आएका मुसलमानलाई बिहान स्वास्थमा असहज देखिएपछि लुम्बिनीको मजिदियास्थित अस्पताल लगिएको थियो।
त्यहाँ उपचार हुन नसकेपछि भैरहवा लैजाने तयारी गर्दै गर्दा उनको निधन भएको ज्ञवालीले जानकारी दिइन्।
७३ वर्षीय मुसलमानका चार छोरा र तीन छोरी छन्। अहिले उनको शवलाई घरमा लगिएको र आफ्नो धार्मिक संस्कार अनुसार अन्तिम संस्कार गरिने पारिवारिक स्रोतले जनाएको छ।
सरल र सहज स्वभावका मुसलमान २०७९ सालको निर्वाचनमा नेपाली कांग्रेसबाट सांस्कृतिक नगरपालिकाको प्रमुखमा निर्वाचित भएका थिए।
उनी जनमत पार्टीका उम्मेदवार चन्द्रकेश गुप्तालाई पराजित गरी नगरप्रमुख निर्वाचित भएका थिए।
-1746009348.jpg)
