काठमाडौं महानगरपालिकाका मेयर बालेन्द्र महानगर प्रहरीको काम सिनेमा हेरेजस्तो लाग्ने बताएका छन्।
३३ औँ महानगर प्रहरी दिवसको अवसरमा शनिबार काठमाडौंमा आयोजित कार्यक्रममा उनले सानोमा आफूले हलिउड फिल्म हेर्दाखेरी सिटी पुलिसले गरेको जस्तो काम अहिले काठमाडौं महानगर प्रहरीले गरिरहेको बताएका हुन्।
'सानोमा हामी हलिउड फिल्महरु हेर्थ्यौं। त्यसमा न्यूयोर्क सिटी पुलिसको काम हेर्दाखेरी देशका सिटी पुलिस कस्तो हुनुपर्छ भन्ने कुराहरु सिनेमामा मात्रै हेर्न पाइने होला जस्तो लाग्थ्यो पहिले। अचेल चाहिँ तपाईहरुको काम हेर्दाखेरी कहिलेकाहीँ सिनेमा हेरेजस्तो पनि लाग्छ,' उनले भने।
फिल्ममा देखाइने काम यथार्थमा हुनु खुशीको कुरा भएको उनले बताए।
उनले काठमाडौं महानगरबाट धेरै पालिकाहरुले काम गर्ने शैली सिक्न खोजेको पनि बताए। त्यसमा महानगर प्रहरीको ठूलो योगदान रहेको उनको भनाइ छ ।
'जुन ठाउँहरुले काठमाडौ महानगरपालिकाबाट केही सिक्न खोज्नुहुन्छ, त्यो सिकाइमा तपाईंहरुको ठूलो योगदान छ। सार्वजानिक सम्पत्ति संरक्षण, अतिक्रमण हटाउनेदेखि लिएर काठमाडौं महानगरपालिकामा सुशासन, सुव्यवस्था, अनुगमन गर्ने कामहरुमा तपाईंहरुको उल्लेखनिय योगदान रहेको छ,' उनले भने।
काठमाडौं महानगरपालिकालाई जसरी एउटा राजधानीको रुपमा चिनिन्छ, महानगर प्रहरी बल पनि काठमाडौको एउटा पर्यायबाची पहिचानको रुपमा स्थापित भएको उनले बताए।
तपाईंहरुले देखाउनुभएको कर्मनिष्ठा, योगदानहरु अहिलेको वितेको ३ वर्षमा मात्रै नभएर आगामी दिनहरुमा पनि विभिन्न सिटी पुलिस तथा स्थानिय सरकारहरुलाई एउटा सिकाइको रुपमा रहनेछ,' उनले भने।
-1746009348.jpg)
