नेकपा (एकीकृत समाजवादी) का अध्यक्ष माधवकुमार नेपालले पतञ्जली जग्गा प्रकरणमा आफूमाथि बिना कारण मुद्दा लगाइएको बताएका छन्।
शनिबार काठमाडौंमा आयोजित एक कार्यक्रममा उनले नेपालको कानुनले हदबन्दी छुटलाई नियमन गर्ने सम्बन्धी विशेष व्यवस्था गरेको भए पनि आफूमाथि बिनाकारण मुद्दा लगाइएको बताएका हुन्।
'नेपाल सरकारले सूचित आदेश बमोजिम हदबन्दीको जग्गा राख्न दिन स्वीकृति दिन सक्नेछ । स्वीकृति दिँदा आवश्यक शर्तहरु तोक्न सक्नेछ । अर्थात हदबन्दी भन्दा बढी जग्गा राख्न दिने अधिकार नेपाल सरकारसँग छ । यस केसमा क्याबिनेटले सर्वसम्मतिले निर्णय गरेर दिएको हो । हदबन्दी भन्दा बढी जग्गा राख्न दिएर गल्ती काम भयो भन्नेकुराको कानूनी आधार छैन,' उनले भने।
त्यतिबेलाको मन्त्रिपरिषद्कमा पूर्वराष्ट्रपति विद्यादेवी भण्डारीदेखि अहिले सत्तामै रहेको दल एमालेका महासचिव शंकर पोखरेलसम्मका नेताहरू रहेको बताए।
'त्यो बेला मन्त्रिपरिषदमा विद्या भण्डारीदेखि लिएर सुजाता कोइरालासम्म । अहिले सत्ताधारी पार्टीको महासचिव शंकर पोखरेलदेखि लिएर सुरेन्द्र पाण्डेसम्म । भीम रावललदेखि लिएर मिनेन्द्र रिजालसम्म थिए । यि सबैको सहमति छ त्यहाँ । क्याबिनेटको सर्वसम्मतिले निर्णय भएको छ,' उनले भने।
अध्यक्ष नेपालले कुनै गल्ती र बद्मासी आफूले आफ्नो जीवनमै नगरेको दाबी गरे। —न्युज एजेन्सी नेपाल
-1746009348.jpg)
