नेकपा (माओवादी केन्द्र) का अध्यक्ष प्रचण्डले कांग्रेस र एमाले मिलेर बनेको वर्तमान सरकार विचौलियाले बनाइदिएको गम्भीर आरोप लगाएका छन्।
मध्यपहाडी लोकमार्ग केन्द्रित अभियान अन्तर्गत शनिबार साँझ लमजुङको भोर्लेटार पुगेका प्रचण्डले साँझ आयोजित सभामा बोल्दै उक्त आरोप लगाएका हुन्।
‘अहिले कांग्रेस र एमालेको सरकार छ नि। यो कांग्रेस र एमालेले बनाएको सरकार होइन। दलाल विचौलियाले बनाइदिएको सरकार हो यो। उनीहरूलाई खरिद गरेर र अलिअलि धम्क्याएर,’ प्रचण्डले भने।
सरकार बनाउन विचौलियाले अँध्यारो रातमा आफ्नै घर र होटलमा नेताहरूलाई लगेको पनि उनले बताए। विचौलिया, दलाल पूँजीपतीले आफ्ना ठूला–ठूला होटल र घरमा कांग्रेस र एमालेका नेता लगेर सरकार बनाएको उनको आरोप छ। कांग्रेस र एमाले नमिले देश माओवादीले लैजाने र विचौलिया र ती पार्टीको भविष्य नरहने देखेर त्यसो गरेको पनि प्रचण्डको जिकिर छ।
‘म तपाईंहरूलाई अलि गम्भीर ढंगले भन्न चाहिरहेको छु, पार्टीका नेताहरूलाई विचौलियाले औंलामा फनफनी घुमाउँदा रहेछन्,’ उनले भने, ‘विचौलियाहरूले आयोजना गरेर तिमीहरू नमिल्ने भए देश माओवादीले लाने भयो। हाम्रो त भविष्य बर्बाद हुने भयो। तिमीहरू पनि सिद्धिने भयौ भनेर माओवादीलाई हटाउन तिमीहरू दुईटा नमिली हुन्न भनेर ती विचौलियाले अलिअलि पैसा दिएर अलिअलि धम्क्याएर यो सरकार असंवैधानिक, अलोकतान्त्रिक सरकार बन्यो।’
विचौलियाले वर्तमान सरकार बनाएको आरोप लगाएका प्रचण्डले को–को विचौलिया यो प्रक्रियामा संलग्न छन् भनेर खुलाएनन्। उनले कमिशन खाएर अर्बौं कुम्ल्याउने विचौलिया अहिले शक्तिशाली बनेको पनि आरोप लगाए। भ्रष्टाचार गरेर जनतालाई गरिब बनाएको भन्दै उनले भ्रष्टाचारीलाई लखेट्न अभियानमा जुटेको बताए।
‘ती विचौलियाहरू जसले केही काम गर्दैनन्। उद्योग स्थापना गर्दैनन्। रोजगारी सिर्जना पनि गर्दैनन्, खाली कमिशन खाएर रातारात अर्बौं कमाउँछन्। ती विचौलिया यस्ता शक्तिशाली रहेछन्,’ उनले भने।
माओवादीले सुशासनका पक्षमा राम्रो काम गर्न खोज्दा खोज्दै संविधान मिचेर हटाएको भन्दै उनले कथाव्यथा सुनाउन जताजतै घरदैलोमा आएको बताए।
‘तिमीहरूले तथाकथित संख्याको बलमा हामीले सुशासनको पक्षमा, जनता र राष्ट्रको पक्षमा राम्रो काम गर्न खोज्दा खोज्दै संविधान मिचेर जबरजस्ती हटाएका छौं,’ उनले भने, ‘हामी फेरि जनताको घरदैलोमा जान्छौं। सबै कथाव्यथा सुनाउँछौं। भ्रष्टाचारीलाई, यी बदमासलाई लखेट्न सक्छौं।’
विभाजित माओवादीहरू पनि सबै जुटाउन आफू लागेको प्रचण्डले बताए। माओवादीहरू फेरि एकढिक्का गर्न बल गरेको भन्दै उनले सकारात्मक संकेतहरू मिलेको पनि बताए। केही माओवादीहरू मिलिसकेको र अरू पनि मिल्ने उनले बताए।
अर्को प्रसंगमा प्रचण्डले देशमा ‘पपुलिजम’ हावी भएको पनि बताए। नयाँ ध्रुवीकरण ल्याएर त्यसलाई रोक्ने प्रयत्न गरेको पनि उनले बताए।
‘देशमा तथाकथित लोकप्रियतावाद या पपुलिजम भन्छ नि। त्यसको इतिहास पनि छैन। विचार पनि छैन। हावाहुरी ल्याएर यही हो भन्या जस्तो बनाउनेलाई हामीले नयाँ ध्रुवीकरण ल्याएर रोक्नुपर्छ भनेर लागेका छौं,’ उनले भने।
शनिबार साँझ लमजुङको मध्यनेपाल नगरपालिका प्रवेश गरेका प्रचण्ड साँझ नै इशानेश्वर महादेव मन्दिर क्षेत्र विकास समितिको कार्यक्रममा सहभागी भएका थिए। उनले मन्दिर अवलोकनसमेत गरे।
शनिबार लमजुङको भोर्लेटारबाट पुनः सुरु भएको माओवादीको मध्यपहाडी लोकमार्ग केन्द्रित अभियानमा प्रचण्ड आइतबार बिहान माओवादी युद्धका शहीद राममणि भट्टराईका परिवारलाई भेट्न उनकै घर पुगेका थिए।
आइतबार लमजुङको सुन्दरबजारमा जनसभा आयोजना गरिएको र उक्त सभालाई सम्बोधन गरेर प्रचण्ड गोरखा प्रवेश गर्ने माओवादी गण्डकीका संसदीय दलका नेता हरिबहादुर चुमानले जानकारी दिए।
अभियानमा माओवादी उपाध्यक्षहरू नारायणकाजी श्रेष्ठ, कृष्णबहादुर महरा, अग्निप्रसाद सापकोटा, महासचिव देव गुरुङ लगायतका नेता सहभागी छन्।
-1746009348.jpg)
