नेकपा (एमाले)को केन्द्रीय अनुशासन आयोगले पार्टीभित्र देखिएको विकृति र विसंगतीहरू औंल्याएको छ।
ललितपुरको गोदावरीमा जारी विधान महाधिवेशनमा केशव बडाल अध्यक्ष रहेको केन्द्रीय अनुशासन आयोगबाट प्रस्तुत भएको प्रतिवेदनले पार्टीभित्र देखिएको विसंगतीहरू औंल्याएको हो।
प्रतिवेदनले पार्टीका नेता कार्यकर्ताहरूमा देखिएको विसंगतीलाई कुण्ठा र अतृप्त महत्वाकांक्षा, वैयक्तिक स्वार्थ, लाभ र अवसरको अनुचित आशक्ति, विचार र आचरणमा समस्या र सांगठानिक अराजकता गरी पाँच उपशीर्षकमा विभाजन गरी त्यसको ब्याख्या गरेको छ।
प्रतिवेदनले व्यक्तिगत महत्वाकांक्षा पूर्तिका लागि गुट उपगुट बनाइएको र त्यसले अन्ततः पार्टी विभाजन भएको जनाएको छ।
अहिले पनि पार्टीमा कतिपय व्यक्तिहरू काम गरेबापत विशिष्ट सुविधाहरू पाउनुपर्छ भन्ने ठान्दछन्। उनीहरूले आकांक्षा गरेबमोजिमको सुविधाहरू प्राप्त हुन नसक्दा निराश हुने, कुण्ठाग्रस्त हुने, संकिर्ण सोँच राख्ने तथा लापरवाह हुने गरेको देखिएको छ। पार्टीभित्र सामान्य बहस हुँदा समेत यिनिहरूले आफ्नो पक्षधरता देखाइहाल्ने गरेका छन्,' प्रतिवेदनमा भनिएको छ।
पार्टीमा विवाद र संकटपूर्ण अवस्था सिर्जना भएका बेला यस्ता व्यक्तिहरू मोलमोलाइ गर्न थाल्ने पनि प्रतिवेदनमा उल्लेछ छ। 'यो प्रवृत्ति कुण्ठाको सुसुप्तरूप हो। संकिर्ण र कमजोर चेतना हो। यो नैतिक सोँच होइन,' प्रतिवेदनमा भनिएको छ।
पार्टीजीवनमा वैयक्तिक स्वार्थहरू विभिन्न ढंगले प्रकट भइरहेको पनि प्रतिवेदनमा उल्लेख छ।
'कतिपय नेताहरूले पार्टीको विभिन्न तहको नेतृत्वमा पुग्नका लागि केही माथिल्लो तहका नेताहरूलाई प्रभावित गर्ने र नेताहरूको वरिपरि घुमिरहने गणेश प्रवृत्ति पनि देखिएको छ। कतिपय पार्टी तथा नेता कार्यकर्ताहरू आत्मकेन्द्रित र व्यक्तिवादी हुँदै गएका छन्। आफ्नो स्वार्थ पूरा नहँदा पार्टी काम वा निर्वाचनमा निस्क्रिय वा असहयोगी बनेका छन्,' प्रतिवेदनमा भनिएको छ।
प्रतिवेदनले औंल्याएको तेस्रो विसंगती व्यक्तगत लाभको आशक्ति हो।
'यस्तो अनुचित आशक्तिको कारणले सार्वजनिक क्षेत्रमा रहेका कतिपय नेताहरूप्रति आम जनतामा नकारात्मक धारण बनिरहेको छ। यसले गर्दा नेताहरूको सार्वजनिक जीवन विवादित बनिरहेको अवस्था छ,' प्रतिवेदनमा भनिएको छ।
प्रतिवेदनले कतिपय नेताहरू खर्चालु भएको बताएको छ।
'सार्वजनिक जीवनको आकर्षण (ग्लेमर)ले कतिपय नेताहरूको जीवनशैली बदलिएको छ र खर्चालू भएको अवस्था पनि छ,' प्रतिवेदनमा भनिएको छ।
केही नेताहरूमा विचार र आचरणमा समस्या रहेको पनि प्रतिवेदनले औंल्याएको छ।
जसमा यौनजन्य आचरणबारे पनि प्रश्न उठाइएको छ।
'पार्टीभित्र र जनसंगठनमा यौनजन्य आचरणहरू समेत कतै कतै देखिन थालेका छन्। जनस्तरबाट नै प्रश्न उठिसकेपछि समेत आचरणलाई सच्याउनुको सट्टा उनीहरूबाट सार्वजनिक रूपमा दम्भ प्रकट भइरहनु दुःखद कुरा हो,' प्रतिवेदनमा भनिएको छ।
एमाले पोलिटब्युरो सदस्य मोहन बानियाँ, महेश बस्नेत, केन्द्रीय सदस्य ऐन महर, कर्णाली प्रदेश अध्यक्ष गुलाबजङ्ग शाहमाथि यौन विचलनको आरोप लाग्दै आएको छ। पार्टीले कारबाहीको विषय बनाएको छैन।
आयोगले उठाएको पाँचौं विषय सांगठानिक अराजकताबारे छ। आयोगले सांगठानिक अराजकता पार्टी जीवनको चुनौतीका रूपमा रहेको उल्लेख गरेको छ।
'कतिपय नेताहरूबीच एकआपसमा परस्पर विश्वास नभएको अवस्था छ। कमिटीमा रहेकाहरूलाई कमिटीमा छु भन्ने अनुभूति नभएको समेत देखिएको छ,' प्रतिवेदनमा भनिएको छ, 'कतिपय जनप्रतिनिधिहरूले सम्बन्धित पार्टी कमिटीसाग समन्वय गर्ने चासो देखाएको पनि देखिँदैन। यो गम्भीर अवस्था छ,' प्रतिवेदनमा भनिएको छ।
-1757056588.jpg)
-1746009348.jpg)
