भ्रष्टाचार र सामाजिक सञ्जाल बन्दविरूद्ध पोखरामा उर्लिएको जेनजी पुस्ताको प्रदर्शन रोकिएको छ।
प्रदर्शनमा राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले घुसपैठ गरेपछि आन्दोलन रोकिएको जेनजी प्रदर्शनकारीले जनाएका छन्।
पोखराको सभागृह चोकबाट सुरू भएको आन्दोलन मानव अधिकार चोक पुगेर स्थगित गरिएको आन्दोलनका अगुवा आशिष पुरीले बताए।
‘पार्टीका झोलेहरू घुसपैठ गरेर अराजकता मच्चाउन खोजेपछि हामीले प्रदर्शन स्थगित गरेका छौं,’ उनले भने, ‘अराजकतातिर जान नदिन पनि आन्दोलन रोकिएको हो।’
प्रदर्शनमा राप्रपा र रास्वपाका कार्यकर्ताले उत्तेजक नारा लगाउने, भिडलाई उत्तेजित बनाउन खोज्ने र प्रहरीसँग मुडभेड गराउन खोजेको प्रदर्शनकारीको आरोप छ।
घुसपैठ भएको भन्दै प्रदर्शनकै बीचमा पनि केही युवाले विरोध जनाएका थिए।
भ्रष्टाचार र सामाजिक सञ्जाल बन्दकाविरूद्ध स्वतस्फुर्त रुपमा सडकमा आएका युवाले भ्रष्टाचारको अन्त्य गर्न, सामाजिक सञ्जाल पुन: सञ्चालन गर्न र युवा पुस्तामा नेतृत्व हस्तान्तरण गर्न माग राखेका थिए।
सन् १९९७ देखि २०१२ को बीचमा जन्मिएका जेनजी पुस्ताको नेतृत्व र सहभागितामा भएको प्रदर्शनमा युवा एवं विद्यार्थीको सहभागिता रहेको थियो।
* शीर्षक सम्पादन गरिएको
-1746009348.jpg)
