नेकपा एमालेको विद्यार्थी संगठन अनेरास्ववियुको गण्डकी प्रदेश सहसंयोजक विश्वदर्शन पराजुलीले पार्टी परित्याग गरेका छन्।
आफू आबद्ध पार्टी नेतृत्वको सरकारले जेनजी पुस्ताको आन्दोलनलाई चरम दमन गरेको भन्दै उनले पार्टी परित्यागको घोषणा गरेका हुन्।
पार्टी नेतृत्वको सरकारले आफू जस्तै युवा पुस्ता, राज्य र जनताप्रति घात गरेको भन्दै उनले यसको मतियार हुन नसक्ने बताएका छन्।
सामाजिक सञ्जाल फेसबुकमा एमालेको सदस्यता पत्र राख्दै उनले अबदेखि पार्टीका लागि नभई देशका लागि योगदान दिने पनि बताएका छन्।
‘मेरो पार्टीले नेतृत्व गरेको सरकारले जब म र म जस्ता युवासँगै सिङ्गो राज्य र जनताप्रति घात गर्छ भने म यसको मतियार बनिरहन सकिनँ,’ उनले लेखेका छन्, ‘म एक कार्यकर्ताले जति दिएँ, पार्टीलाई दिएँ। अब देशलाई दिने विचारका साथ आजैको मितिदेखि नेकपा एमालेको पार्टी सदस्यता निष्क्रिय पार्दै अनेरास्ववियुमा रहेको जिम्ममेवारीबाट राजीनामा दिएको स्वघोषणा गर्दछु।’
पराजुलीले २०७१ मंसिर १ गते एमालेको पार्टी सदस्यता पाएका थिए।
एमालेमा रहँदा पार्टी र सरकारबाट कुनै पनि लाभ नलिएको र कुनै पनि व्यक्ति र संस्थाबाट १ रुपैयाँ पनि चन्दा नलिएको उनले स्वघोषणा गरेका छन्।
पोखरामा होटल संचालन गरिरहेका पराजुली अखिलमा २०६७ सालदेखि आवद्ध भएका थिए। उनी अखिलका पूर्व केन्द्रीय सदस्य समेत हुन्।
पार्टी परित्यागको घोषणा गर्नुअघि उनले सरकारलाई राजीनामा दिएर मार्गप्रशस्त गर्न पनि अपिल गरेका थिए।
‘गोली ठोकेर आवाज बन्द गर्ने कुचेष्टा नगर सरकार, राजीनामा दिएर मार्गप्रशस्त गर,’ उनले लेखेका छन् ।
-1746009348.jpg)
