राष्ट्रिय प्रजातन्त्र पार्टी (राप्रपा) ले जेनजी पुस्ताले गरेको आन्दोलनमा सरकारले गरेको दमनपछि सरकार विघटनको माग गरेको छ।
सोमबार अपराह्न केन्द्रीय कार्यालय धुम्बाराहीमा बसेको पदाधिकारी बैठकपछि राप्रपाले सरकार विघटनको माग राखेको हो।
यस्तै, यो घटनालाई इतिहासकै क्रुर र दु:खद् भएको पार्टीले बताएको हो।
‘आजको बर्बर दमनपूर्ण घटनालाई राप्रपाले नेपाली इतिहासकै क्रुर र दुःखद् घटनाको रूपमा लिएको छ। यस घटनाबाट वर्तमान सरकारको उपादेयता समाप्त भएको राप्रपाको निष्कर्ष रहेको छ। तत्काल सरकार विघटन र सबै समस्याको समाधान तथा नयाँ समझदारीको लागि राप्रपा आह्वान गर्दछ,’ प्रवक्ता मोहन श्रेष्ठले विज्ञप्ति जारी गर्दै भनेका छन्।
भ्रष्टाचारविरूद्ध उत्रिएका युवाहरूमाथि बल प्रयोग र गोली समेत प्रहार गरी आवाजलाई निस्तेज र निमिट्यान्न पार्न खोजिएको उनको भनाइ छ।
‘भ्रष्टाचारविरूद्ध सडकमा ओर्लिएका नयाँ पुस्तालाई अन्धाधुन्ध बल प्रयोग र गोली समेत प्रहार गरेर सरकारले भ्रष्टाचार विरूद्धको आवाज निस्तेज र निमिट्यान्न पार्ने निन्दनीय र लाजमर्दो प्रयास गरेको छ। शान्तिपूर्ण प्रदर्शनमाथिको जंगली रवैयाबाट सरकारको स्वेच्छाचारी, अलोकतान्त्रिक र सर्वसत्तावादी चरित्र उदांगो भएको छ,’ विज्ञप्तिमा भनिएको छ।
राप्रपाले मृतक युवाहरूप्रति श्रद्धान्जली र मृतक परिवारमा समवेदना प्रकट गरेको छ।
-1745833170.jpeg)
-1746009348.jpg)
