नेपाली कम्युनिष्ट पार्टीका संयोजक पुष्पकमल दाहाल 'प्रचण्ड' ले नेपाली कम्युनिष्ट पार्टी पहिलो शक्ति हुने बताएका छन्।
उनले नेपाली कम्युनिष्ट पार्टीलाई पहिलो शक्ति हुनबाट अब कसैले रोक्न नसक्ने पनि बताए।
‘अस्ति १० पार्टीको ऐतिहासिक हो है यो एकता भनेको थिएँ, यसलाई पहिलो पार्टी बन्नबाट रोक्न सकिँदैन। सक्दैन कसैले भनेको थिएँ, आज यो एकीकरण र समायोजनले त्यो भनाइलाई थप पुष्टि गर्ने आधार दिएको छ,’ भीम रावल लगायतलाई बुधबार नेपाली कम्युनिष्ट पार्टीमा स्वागत गर्दै संयोजक प्रचण्डले भने।
उनले युवाहरूलाई चुनावमा टिकट दिइने पनि बताए।
‘यो पार्टीमा अझै साथीहरू आउँदै हुनुहुन्छ, कुराकानी भइरहेको छ। हेर्नुहोला- अब हप्ता हप्तामा यस्तो (पार्टी एकीकरण) कार्यक्रम गर्न पर्ने हो कि भन्ने लागेको छ,’ हाँस्दै उनले भने।
साथै उनले जेनजी युवाहरूलाई पार्टीले समेट्ने पनि बताए। प्रदेश र जिल्लाहरूमा नेताहरू पुगेर एकताका लागि अपिल गरिने र राष्ट्रिय शक्ति निर्माण गरिने उनले बताए।
उनले जनसुरक्षा टिम पनि बनाउने बताएका छन्। जनताको जीवनमा परिवर्तन ल्याउन पहिले नेताहरू परिवर्तन हुनुपर्ने पनि प्रचण्डको भनाइ छ।
-1746009348.jpg)
