नेपाली कांग्रेसका नेता देवराज चालिसेले पार्टीको वैधानिकता र आन्तरिक निर्णय प्रक्रियामाथि प्रश्न उठाउने प्रयासप्रति आपत्ति जनाएका छन्।
उनले कांग्रेसका प्रत्येक सांगठनिक गतिविधि पार्टीको विधानअनुसार सञ्चालन हुने भन्दै पार्टीको वैधानिकता प्रमाणित गर्न सत्तापक्षको कुनै कृपापात्रको आवश्यकता नरहेको बताएका छन्।
‘कांग्रेसको वैधानिकता प्रमाणित गर्न सत्ताद्वारा खडा गरिएको कुनै सिखण्डी, प्यादा वा कृपापात्रको आवश्यक पर्दैन, लाखौँ सदस्यको अभिमत, तिनको सहभागिता र पार्टीको वैधानिक प्रक्रियाबाट प्राप्त निर्णय नै कांग्रेस सञ्चालनको आधार हो,’ उनले भने।
चालिसेले लाखौँ सदस्यको अभिमत, सहभागिता र पार्टीको वैधानिक प्रक्रियाबाट प्राप्त निर्णय नै कांग्रेस सञ्चालनको आधार भएको उल्लेख गरेका छन्। पार्टीभित्र असहमति र विमति हुनु स्वाभाविक भएको भन्दै त्यस्ता विषय लोकतान्त्रिक प्रक्रियाबाटै समाधान हुने उनको भनाइ छ।
कांग्रेसको आन्तरिक विषयमा लोकतन्त्रविरोधी शक्तिले हर्षबढाइँ गर्न आवश्यक नरहेको बताउँदै उनले पार्टीभित्रका समस्या समाधान गर्न कांग्रेस आफैँ सक्षम रहेको दाबी गरेका छन्।
उनले सत्तारूढ पक्षलाई आफ्नो कमजोरी सम्हाल्न सुझाव दिँदै कांग्रेसको आन्तरिक मामिलामा अनावश्यक चासो नदेखाउन चेतावनी दिएका छन्।
कांग्रेस सामाजिक सञ्जालका स्टाटस र उत्तेजनात्मक भाषणका आधारमा निर्माण भएको पार्टी नभएको उल्लेख गर्दै चालिसेले कलाकार र राजनेता, भीड जम्मा गर्नु र राजनीतिक दल निर्माण गर्नु तथा चुनाव जित्नु र लोकतान्त्रिक संस्कार स्थापित गर्नुबीच ठूलो अन्तर रहेको टिप्पणी गरेका छन्।
सत्ताको उन्मादमा इतिहासलाई चुनौती नदिन चेतावनी दिँदै उनले शक्ति स्थायी नहुने र अहंकारको आयु झन् छोटो हुने बताएका छन्। इतिहासले कसैलाई सधैँ उन्मुक्ति नदिने भन्दै उनले सत्ताको आडमा दबाइएका र ओझेलमा पारिएका प्रश्नहरूको जवाफदेहिताको दिन पनि आउन सक्ने बताएका छन्।
