एकीकृत समाजवादीसहित ८ वटा घटकसँग एकता गर्ने निर्णयपछि जनार्दन शर्माले माओवादी केन्द्र छाडेर अहिले प्रगतिशील राष्ट्रिय अभियान घोषणा गरेका छन्।
बिहीबारमात्रै उक्त अभियानले केन्द्रीय संयोजन समितिमा रहेका ३१ जनाको नाम सार्वजनिक गरेको छ। त्यसमा सुदन किराती लगायतका नेताहरू देखिएका छन्। जनार्दन शर्मा र राम कार्की लगायत माओवादी केन्द्रबाट विद्रोह गरेका नेताहरूको नाम भने त्यसमा उल्लेख छैन।
जनार्दन पक्ष पूर्ववत् माओवादीका को–को नेताहरू आफ्नो अभियानमा जोडिएका छन् भन्ने विषय तत्काल नखुलाउने रणनीतिमा छ। नेताहरूलाई पनि नखुल्न भनिएको छ।
सो अभियानले पनि अहिलेको परिस्थितिमा निर्वाचन एकमात्र विकल्प भनेको छ। भोलि निर्वाचनको समयमा उम्मेदवार लगायत विभिन्न बाटोमा जनार्दनसँग को–को छन् भन्ने अवश्य देखिने नै छन्।
तर आफ्नै गृहजिल्ला रुकुम पश्चिममा जनार्दन अहिले कति शक्तिशाली छन् भन्ने विषयमा सबैको चासो छ।
रुकुम पश्चिमबाट तत्कालीन माओवादी केन्द्रमा १९ जना केन्द्रीय सदस्य थिए। तीमध्ये अहिले २ जनामात्रै जनार्दनको पक्षमा लागेको एक केन्द्रीय सदस्यले जानकारी दिए।
कर्णाली प्रदेशका पूर्वमुख्यमन्त्री रहेका राजकुमार शर्मा र पूर्ववत् माओवादी केन्द्रमा वैकल्पिक केन्द्रीय सदस्य रहेका गोरखबहादुर केसी मात्रै जनार्दनको पक्षमा खुलेका छन्।
राजकुमार जनार्दनका फुपूका छोरा र गोरखबहादुर बहिनी ज्वाइँ हुन्।
कुनै दिन जनार्दनका विश्वासपात्र मानिने कर्णाली प्रदेश अध्यक्ष विमला केसी, रुकुम पश्चिम जिल्ला अध्यक्ष सचिन रोका, केन्द्रीय सदस्य गोपाल शर्मा र लक्ष्मी पुन लगायतका नेताहरू पनि नेपाली कम्युनिस्ट पार्टीमा खुलेका छन्।
ती नेताका अनुसार १९ केन्द्रीय सदस्यमध्ये १७ जना संस्थापन पक्षमा छन्।
स्रोतका अनुसार चौरजहारी नगरपालिकाकी मेयर तथा पूर्व माओवादी केन्द्रकी केन्द्रीय सदस्य पुष्पा वादीलाई पनि यसअघिसम्म जनार्दन निकट मानिन्थ्यो। यद्यपि पछिल्लो समय उनी मौन छिन्।
जनार्दनको पछि लाग्दा कारबाही हुन सक्ने र पद धरापमा पर्ने डरले गर्दा पनि उनी मौन बसेको हुन सक्ने एक नेताले बताए।
विगतमा रुकुम पश्चिममा बसोबास भए पनि पछिल्लो समय बसाइँ सरी दाङमा बस्दै आएका तत्कालीन केन्द्रीय सदस्यहरू जगप्रसाद शर्मा (अपार) र नारायणी शर्मा भने जनार्दनकै पक्षमा उभिएका छन्।
नारायणी जनार्दनकी कान्छी बहिनी हुन् भने राष्ट्रियसभा सदस्य अपार पनि फुपूका छोरा हुन्। त्यस्तै केन्द्रीय सदस्य ओम शर्मा पनि जनार्दनकै पक्षमा उभिएका छन्। उनी जनार्दनका ज्वाइँ हुन्।
त्यस्तै पछिल्लो सीमांकनका क्रममा रुकुमपूर्वमा तत्कालीन माओवादी केन्द्रका ६ केन्द्रीय सदस्यमध्ये एक जनाले पनि हालसम्म जनार्दनको पक्षमा खुलेका छैनन्।
केन्द्रीय सदस्य गणेशमान पुन र उनकी श्रीमती कमला रोका प्रचण्डकै लाइनमा उभिएका छन्। गणेशमान वाईसीएलका पूर्व अध्यक्ष हुन्। जनार्दन निकट मानिने कृष्ण रेग्मी हालसम्म कतै खुलेका छैनन्।
रोल्पामा पनि जनार्दनको पक्षमा हालसम्म एक जना केन्द्रीय सदस्य पनि खुलेका छैनन्। नन्दबहादुर पुन, वर्षमान पुन, ओनसरी घर्ती, कृष्णबहादुर महरा लगायतका नेताहरू सबै प्रचण्डकै पक्षमा छन्।
सल्यानका तत्कालीन माओवादी केन्द्रका १६ केन्द्रीय सदस्यमध्ये एक जनाले पनि जनार्दनका पक्षमा खुलेका छैनन्।
नेपाली कम्युनिस्ट पार्टीका जिल्ला तहका नेता मानबहादुर मल्लका अनुसार सल्यानका सबै केन्द्रीय सदस्य प्रचण्ड संयोजक रहेको पार्टीमा आबद्ध छन्।
‘जनार्दनजी र हामी एउटै फर्मेसनमा काम गरेका व्यक्तिहरू हौं,’ मल्लले भने, ‘उहाँ जत्तिकै नेता पार्टी फोडेर जानुहुन्छ भन्ने लागेकै थिएन,’ उनले भने।
तत्कालीन माओवादीका एक नेताका अनुसार प्रचण्डसँग छुट्टिनुअघि जनार्दनको गृहजिल्लामा मात्रै होइन, पूरै कर्णाली प्रदेशमा वर्चस्व थियो। तर, पार्टी छाडेपछि आफ्नै जिल्लामा जनार्दन कमजोर देखिएका छन् भन्ने उनको भनाइ छ।
जाजरकोटमा जनार्दनको पक्षमा एक जनाले पनि केन्द्रीय सदस्य खुलेर लागेका छैनन्। जाजरकोटका पूर्ववत् माओवादीका जिल्ला संयोजक टेकबहादुर रावलका अनुसार जिल्लामा १२ जना केन्द्रीय सदस्य सबै एकीकृत पार्टीमै आबद्ध छन्।
‘जनार्दनजी हाम्रो नेता हो, तर यो पार्टी फोडेर जाने बेला होइन,’ रावलले भने, ‘उहाँ फर्किनुपर्छ र फर्किनुहोस् भन्ने हाम्रो चाहना छ,’ उनले भने।
तत्कालीन माओवादी केन्द्रमा कर्णालीमा ९० जना जति केन्द्रीय सदस्य थिए। असोजमा भएको बैठकमा तीमध्ये ६३ जना केन्द्रीय सदस्य सहभागी थिए। उनीहरूमध्ये प्रदेशभरबाट जम्मा चार जना मात्रै जनार्दनको पक्षमा उभिएको स्रोतको दाबी छ।
-1746009348.jpg)
