अमेरिकी विदेश मन्त्री मार्को रूबियोले विभिन्न दीर्घकालीन स्वास्थ्य समस्यासँगै मोटोपना भएकालाई पनि अमेरिकाको भिसा नदिनेबारे विचार गर्न निर्देशन दिएका छन्।
अमेरिकाको संघीय सरकारको 'सार्वजनिक भार' सम्बन्धी एक नियमले सम्भावित आप्रवासीहरूलाई भविष्यमा सार्वजनिक सहायता आवश्यक देखिएमा अमेरिका प्रवेशमा रोक लगाउन दिन्छ। सोही नियमको कडा व्याख्या गर्दै रूबियोले त्यस्तो निर्देशन दिएको भनेर अमेरिकी अनलाइन पोलिटिकोले लेखेको छ।
अरू देशमा रहेका अमेरिकी कूटनीतिज्ञहरूलाई भिसा दिनेबारे जारी गरिएको त्यस्तो निर्देशनको परिपत्र आफूले हेरेको पोलिटिकोले जनाएको छ।
'आत्मनिर्भरता लामो समयदेखि अमेरिकी अध्यागमन नीतिको एक सिद्धान्त हो, र सार्वजनिक भारको आधारमा भिसाका लागि अनुपयुक्तता एक सय वर्षभन्दा बढी समयदेखि हाम्रो अध्यागमन कानूनको हिस्सा रहेको छ,' नोभेम्बर ६ मा जारी सो परिपत्रमा भनिएको छ।
अमेरिकाको सेन्टर फर डिजिज कन्ट्रोल एण्ड प्रिभेन्सनलाई उद्धृत गर्दै सो परिपत्रले वयस्कमा हुने मोटोपनाले उच्च रक्तचाप, श्वासप्रश्वास समस्या, पित्तथैलीको पत्थरी र पित्तथैलीको रोग लगायतका जोखिम बढाउने उल्लेख गरेको छ।
'यी सबैलाई महँगो दीर्घकालीन हेरचाह आवश्यक पर्न सक्छ,' परिपत्रले थपेको छ।
परिपत्रले विदेशमा रहेका भिसा दिने अधिकारीहरूलाई हृदय रोग, क्यान्सर र मधुमेहको पनि जाँच गर्न र त्यस विषयमा विचार गर्न निर्देशन दिएको छ।
अमेरिकी राष्ट्रपति डोनाल्ड ट्रम्पले दोस्रो कार्यकालको सुरूदेखि नै अमेरिकामा कानूनी र गैरकानूनी दुवै किसिमको आप्रवासनलाई उल्लेखनीय रूपमा घटाउने प्रयास गरिरहेका छन्। यस प्रयासमा उनको सरकारले विद्यमान अध्यागमन कानूनहरूको कडा व्याख्या र कार्यान्वयन गरिरहेको छ। रूबियोको पछिल्लो निर्देशन पनि त्यसै क्रममा आएको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
