जर्मनीकी पूर्वचान्सलर एन्गेला मर्केलले रूस-युक्रेन युद्धका लागि आफूले पोल्याण्ड र बाल्टिक राष्ट्रहरूलाई आंशिक दोष दिएको आरोपलाई खण्डन गरेकी छन्।
हंगेरीको एक सञ्चार माध्यमसँग अक्टोबरमा दिएको अन्तर्वार्तामा २०२१ मा युक्रेनको सीमा नजिक रूसले सेनाको तैनाथी बढाएपछि मर्केल र फ्रान्सका राष्ट्रपति इमानुअल म्याक्रोंले रूसी राष्ट्रपति भ्लादिमिर पुटिनसँग प्रत्यक्ष वार्ता गर्न खोजेको बताएकी थिइन्। तर पोल्याण्ड र बाल्टिक राष्ट्रहरूले सो प्रस्तावको विरोध गरेको उल्लेख गरेकी थिइन्। त्यसको छ महिनापछि रूसले सन् २०२२ फेब्रुअरीमा युक्रेनमा आक्रमण गरेको थियो।
मर्केलले अन्तर्वार्तामा त्यसो भनेपछि पोल्याण्ड र बाल्टिक देशका नेताहरूले आक्रमणको आंशिक दोष आफूहरू माथि लगाएको भनेर आक्रोश व्यक्त गरेका थिए। सो विषयमा बिहीबार बोल्दै मर्केलले आफूले उनीहरूलाई दोष लगाएको भन्ने कुरा झूटा समाचार भएको बताइन्।
जर्मन मिडियासँगको अन्तर्वार्तामा उनले आफ्नो टिप्पणीलाई गलत ढंगले प्रस्तुत गरिएको उल्लेख गरेकी छिन्।
'त्यो त केवल मेरो पुस्तकमा पहिले नै उल्लेख भएका क्रमिक घटनाक्रमहरू बारेको चर्चा मात्र थियो,' उनले भनिन्।
गत नोभेम्बरमा प्रकाशित उनको पुस्तकमा भएको प्रसंगबारे एक वर्षसम्म कसैलाई कुनै समस्या नभएको र अहिले ठूलो हंगामा मच्चाएको भनेर उनले टिप्पणी गरेकी छिन्।
‘मैले युरोपेली परिषदमा सो प्रस्ताव राख्नु भन्दा केही दिनअघि अमेरिकी राष्ट्रपति जो बाइडेनले भ्लादिमिर पुटिनसँग भेटघाट गर्नुभएको थियो। र मलाई हामी युरोपेलीहरू पनि पुटिनसँग वार्तालाप गर्न नखोजेर त्यो काम पूर्ण रूपमा अमेरिकी सरकारलाई छोडिरहेका छौं भनेर ठीक लागेन,’ उनले थपिन्।
सन् २००५ देखि २०२१ सम्म जर्मनीकी चान्सलर रहेकी थिइन्। मर्केलले २०१४ मा रूसले युक्रेनको क्राइमिया कब्जा गरेपछि पनि पुटिनसँग राम्रो सम्बन्ध राखेको भनेर २०२२ मा युक्रेनमा रूसले आक्रमण गरेपछि आलोचना गरिन्छ। रूसले युक्रेनी भूमि कब्जा गर्दा पनि ठूलो परिमाणमा जर्मनीले रूसी तेल र ग्यास किनेर पुटिनलाई सैन्य शक्ति बढाउन पैसाको जोहो गरेको आरोप लगाइन्छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1756446574.jpg)
-1746009348.jpg)
