युक्रेनका राष्ट्रपति भोलोदिमिर जेलेन्स्कीका प्रमुख सल्लाहका आन्द्रे यमार्कले राजीनामा दिएका छन्।
राष्ट्रपति कार्यालयका प्रमुखसमेत रहेका यमार्कले शुक्रबार पदबाट राजीनामा दिएको अमेरिकी टेलिभिजन नेटवर्क सिएनएनले जनाएको छ।
यमार्क रूस-युक्रेन युद्ध अन्त्यका लागि अमेरिका र युक्रेनले तयार पारेको शान्ति योजनामा प्रमुख वार्ताकार थिए।
भ्रष्टाचार प्रकरणमा उनको घरमा छापा मारेपछि यमार्कले राजीनामा दिएका हुन्।
युक्रेनमा उच्च स्तरका भ्रष्टाचार मुद्दाको छानबिन र अभियोजन गर्ने निकाय भ्रष्टाचार अनुसन्धान ब्युरो र विशेषीकृत भ्रष्टाचार विरोधी अभियोजन कार्यालयले यमार्कको घरमा छापा मारेको थियो।
वाशिङ्टनसँगको संवेदनशील शान्ति–वार्ताको घडीमा आएको यस घटनाले किभमा ठूलो राजनीतिक हलचल सिर्जना गरेको छ।
शुक्रबार राति गरेको टेलिभिजन सम्बोधनमा राष्ट्रपति जेलेन्स्कीले यर्माकले राजीनामा पत्र बुझाएको बताएका छन्।
‘अहिले युक्रेनबारे कसैले पनि प्रश्न गर्न नपरोस् भन्ने मेरो चाहना हो। त्यसैले हामी आन्तरिक निर्णयमा अघि बढिरहेका छौं,’ उनले भने।
दुई हप्ताअघि मात्रै ऊर्जा पूर्वाधारमा ठूला कमिसनको आरोप लागेका प्रकरणमा ती निकायले व्यापक अनुसन्धान सुरु गरेको थियो।
सोही प्रकरणमा दुई मन्त्री पहिले नै पदबाट बाहिरिसकेका छन्।
छापा सुरु भएको बेला यर्माकले टेलिग्राममार्फत आफू ‘पूर्ण रूपमा सहयोग गरिरहेको” बताएका थिए।
यर्माक हालै जिनेभामा भएको अमेरिकी टोलीसँगको वार्तामा युक्रेनी प्रतिनिधिमण्डलका प्रमुख रहेका थिए। अमेरिकी ट्रम्प प्रशासनले दिएका २८ बुँदे शान्ति–प्रस्तावमा रुसको मागहरू हावी भएको भन्दै युक्रेन र युरोपेली मुलुकहरूले कडा आपत्ति जनाएका थिए। त्यसपछि अमेरिकालाई प्रस्ताव संशोधन गर्न मनाउन यर्माकको भूमिका महत्वपूर्ण थियो।
उनको राजीनामाले केही दिनमै हुने अर्को चरणको वार्तामा अनिश्चितता थपेको छ।
यर्माकको स्थान कसले लिने भन्ने प्रश्न यति बेला खुला छ। जेलेन्स्कीले शनिबार सम्भावित उत्तराधिकारीहरूसँग छलफल हुने बताए।
क्रेमलिनका प्रवक्ता दिमित्री पेस्कोभले यर्माक प्रकरणले युक्रेनमा ‘राजनीतिक अनिश्चितता तीव्र गतिमा बढाइरहेको’ अभिव्यक्ति दिए।
‘अहिले के हुन्छ भन्ने भविष्यवाणी गर्न कठिन छ,’ उनले सिएनएनसँग भने।
युक्रेन भ्रष्टाचारका कारण वर्षौँदेखि आलोचित हुँदै आएको छ।
युरोपेली संघ इयूमा सदस्यता पाउन यसको सुधार अत्यावश्यक शर्त बनेको छ। युद्धको बीचमा पनि जेलेन्स्कीले भ्रष्टाचारविरुद्ध कडा कदम चालेका छन्—थुप्रै मन्त्री र उच्च अधिकारी बर्खास्त भएका छन्।
अमेरिकाले वार्तामा ‘प्रगति भएको’ बताइरहे पनि रुसका राष्ट्रपति भ्लादिमिर पुटिनले लामो समयदेखि दोहोर्याउँदै आएको आफ्नो ‘अत्यधिक माग’ मा कुनै लचकता देखाएका छैनन्।
यर्माकको राजीनामाले यस्तो संवेदनशील क्षणमा युक्रेनको कूटनीतिक तागत कम हुन सक्ने चिन्ता बढेको छ।
आगामी वार्तामा किभले कसरी सन्तुलन कायम गर्छ भन्ने अब सबैको नजरमा हुनेछ।
-1764382194.jpg)
-1756446574.jpg)
-1746009348.jpg)
