नेपाली कांग्रेसका नेता महेश आचार्यले पार्टीको संकटमोचनका लागि समयले सभापति शेरबहादुर देउवाबाट उदारता र त्याग खोजेको बताएका छन्।
महाधिवेशनको मितिलाई लिएर कांग्रेसभित्र प्रतिकूल परिस्थिति बनिरहँदा शनिबार फेसबुकमा स्टाटस लेख्दै नेता आचार्यले पार्टीको संकटमोचन देउवाले नै गर्न सक्ने बताएका हुन्।
त्यसका लागि सभापति देउवाले सत्ता राजनीतिबाट विश्राम लिनुपर्ने उनको भनाइ छ।
'कांग्रेसलाई अहिलेको विषम परिस्थितिबाट मुक्त गर्न तपाईंले सत्ता राजनीतिबाट तत्काल विश्राम लिएर चुनाव अघिनै महाधिवेशन गराउने स्पष्ट अभिभावकीय मार्ग निर्देशन गर्न जरुरी देख्दछु,' उनले भने।
नेता आचार्यले कांग्रेसभित्र देउवाको जति अग्लो कद अहिलेको अवस्थामा अरू कसैको नरहेको पनि स्वीकार गरे।
'त्यसैले कांग्रेसको संकटमोचन गर्न समयले तपाईंकै त्याग र उदारता खोजेको छ,' उनले भनेका छन्।
आचार्यले सभापति देउवाको कार्यकाल केही सातामै सकिने र विधानले पुनः सभापति बन्न नदिने अवस्था रहेको पनि स्मरण गराए।
'के तपाईं पुनः प्रधानमन्त्री बन्न चाहनु हुन्छ? कस्को सहयोगमा?,' उनले भनेका छन्, 'ओलीजीको? जो आफ्नै पार्टी भित्र विवादको भुँवरीमा र राज्यका निकायबाट अनुसन्धानको घेरामा हुनुहुन्छ वा प्रचण्डजीको विश्वासमा? जो गठबन्धन फेर्ने कलाबाजीमा अद्वितीय हुनुहुन्छ?,' उनले प्रश्न गरेका छन्।
यी चाहना नभए आफ्नो उत्तराधिकारी स्थापित गर्ने गलत रणनीतिको चक्रव्यूहमा भने नफस्न नेता आचार्यले अनुरोध गरे। यस्तो सोचलाइ देशले, समयले र कांग्रेस राजनीतिले नस्वीकार्नेमा उनले देउवालाई सचेत गराए।
'उदार चित्तले सोच्दा पार्टी राजनीतिमा अब तपाईंका कुनै निजी स्वार्थ बाँकी छैनन् केवल देशको प्रगति र एकताको चाहना अनि पार्टीको गौरवशाली इतिहास र लाखौं कांग्रेसजनको संघर्ष र समर्पणको किर्तिको रक्षा गर्नुनै तपाईंको संघर्षपूर्ण जीवनको ध्येय बन्न पुगेको छ भन्ने मलाई लाग्छ,' उनले भनेका छन्।
देशमा युगले कोल्टे फेरेको र नयाँ चेतनाको जन्म भएको अवस्थामा त्यसको पदचाप र ध्वनि पार्टीले सुन्नुपर्ने उनको भनाइ छ।
नेता आचार्यले पूर्वसभापति सुवर्ण शमशेरको कार्यकाल समेत स्मरण गराएका छन्। विपीलाई विशेष अधिवेशनबाट सभापति निर्वाचित गर्न ढोका खोलिदिएको स्मरण गर्न पनि उनले देउवालाई आग्रह गरे।
'आज फेरी राष्ट्रमा नयाँ पुस्ताको आन्दोलन पछि उठेका मुद्दालाई समेत सम्बोधन गर्न अनि युगीन चेतना र आकाङ्क्षा लाई पुरा गर्न कांग्रेसले नयाँ नेतृत्व, कार्यशैलि र व्यापक नीतिगत सुधार प्रस्तावित गर्न जरुरी भएको छ जस्का लागि तपाईंको निर्णायक अग्रसरता तपाईंको राजनैतिक जीवनको महत्वपुर्ण उपलब्धि हुनेछ,' नेता आचार्यले भनेका छन्।
1637317599.jpg)
-1756446574.jpg)
-1746009348.jpg)
