नेकपा (एमाले) दाङले यही २६ देखि २९ गतेसम्म काठमाडौंमा हुने ११औं केन्द्रीय महाधिवेशनका लागि सर्वसम्मतिमा प्रतिनिधि छनोट गरेको छ।
दाङबाट २३ जना महाधिवेशन प्रतिनिधि सर्वसम्मत रूपमा छनोट गरी पठाएको छ। दाङ महासचिव शंकर पोखरेलको गृहजिल्ला हो। जहाँ जिल्ला अध्यक्ष, महासचिव पोखरेलका बहिनी ज्वाँइ शिवकुमार शर्मा छन्। शर्माले प्रतिनिधि छान्दा मनोमानी गरेको भन्दै नेता-कार्यकर्ताहरूले विरोध जनाएका छन्।
प्रतिनिधि छनोट गर्दा दाङका १० पालिका मध्ये दंगीशरण, शान्ति नगर र बंगलाचुली गाउँपालिकाबाट एक जना पनि छनोटमा परेका छैनन्। सबै भन्दा धेरै घोराहीबाट आठ र तुलसीपुरबाट सात जना प्रतिनिधि छनोट गरिएका छन्।
एमाले दाङका पूर्वअध्यक्ष तथा तुलसीपुर उपमहानगरपालिकाका मेयर टीकाराम खड्का प्रतिनिधिमा परेनन्। तर, तुलसीपुर–१२ बाट दुई जना प्रतिनिधि पठाइएका छन्। जसमा एमाले दाङका सचिव सूर्यबहादुर डाँगी(श्याम) र पूर्वअध्यक्ष हुकुमबहादुर बस्नेत छन्।
सोही महाधिवेशन प्रतिनिधि छनोटप्रति असहमति जनाउँदै लुम्बिनी प्रदेश कमिटी सदस्य तथा पूर्व जिल्ला संगठन विभाग प्रमुख कृष्णप्रसाद भुसालले केन्द्रीय पार्टी संगठन विभागमा उजुरी दिएका छन्। जसमा भुसालले केन्द्रीय नीति विधान र संगठन विभागले बनाएको मापदण्ड अनुरूप प्रतिनिधि छनोट नगरिएको बताएका छन्।
प्रतिनिधि छनोट गर्दा मतदाता नामावली र निर्वाचन कार्यतालिका प्रकाशित नगरिएको पनि उनले गुनासो गरेका छन्।
स्वच्छिक तरिकाले प्रतिनिधि पठाएर जिल्लाका १० हजार ६०० संगठित प्रतिनिधिको हक अधिकार कुण्ठित गरिएको भन्दै भुसालले विरोध जनाएका छन्।
जिल्ला उपाध्यक्ष मनोहर बुढाथोकीले भने प्रतिनिधिको रूपमा छनोटमा नपरेकाहरूले गुनासो गरेको बताए।
‘विधि संगत तरिकाले प्रक्रिया पुरा गरी प्रतिनिधि टुंग्याइएको हो,’ उनले भने, ‘सबैको अभिमत बुझेरै सर्वसम्मत रूपमै जिल्ला पदाधिकारीलाई प्रतिनिधि चुन्न म्यान्डेट प्राप्त भए अनुरुप गरिएको हो।’
विरोध गर्ने नेताहरू तत्कालीन माओवादी केन्द्र र रास्वपाबारे प्रचार गर्नेहरू रहेको पनि उनले आरोप लगाए।
बुढाथोकीले सर्वसम्मत प्रतिनिधि छनोट गर्दा पार्टी एक ढिक्का रहेको म्यासेज गएको दाबी गर्दै भविष्यमा नेपाली कांग्रेस लगायत अरू दलले पनि यो विधि अनुसरण गर्नु उचित हुने तर्क गरे।
प्रचार विभाग प्रमुख संगीत बस्यालले पनि सर्वसम्मत रूपमा प्रतिनिधि चयन गरिनुले एमाले दाङको एकता झल्किएको बताए।
‘प्रतिनिधिमा जाने मेरो पनि चाहाना थियो, तर म पनि परिन,’ उनले भने, ‘आफू प्रतिनिधिमा छनोट नहुँदा कतिपयले अनावश्यक बखेडा झिक्न खोज्नु उचित होइन।’
तर, जिल्ला कमिटीका अर्का एक जना सदस्यले भने विधि र प्रक्रिया विपरित गोजीबाट प्रतिनिधि छनोट गर्नुले पार्टी भित्रको लोकतन्त्र मरेको आभास भएको बताए।
‘विधि अनुरूप गएको भए आज प्रतिनिधि छान्न निर्वाचन भइरहेको हुने थियो,’ उनले भने, ‘तर, यहाँ मनोमानी चल्यो र शुक्रबार बेलुका नै सुटुक्क सामाजिक संजाल मार्फत प्रतिनिधि सार्वजनिक गरियो।’
अर्का एक जना युवा नेताले पनि महासचिवकै जिल्लामा स्वेच्छाचारी ढंगबाट प्रतिनिधि छनोट गरिदा पनि नेतृत्व मौन बस्नुले पार्टी भित्र लोकतन्त्रको चिरहरण भएको मान्नु पर्ने स्थिति देखिएको बताए।
‘फरक विचार निषेध गरी सबै आफ्ना आफन्त मात्रै प्रतिनिधि लैजाँदा कसरी पार्टीको जग बलियो बन्छ,’ उनले प्रश्न गरे, ‘त्यो पनि महासचिवको जिल्लामा स्वेच्छाचारी चल्नुले अघिपछि लोकतन्त्रको जति आदर्श छाँटेपनि त्यो केबल देखाउने दाँत मात्रै रहेछ भन्ने स्पष्ट हुँदैन र?’
-1756446574.jpg)
-1746009348.jpg)
