प्रगतिशील लोकतान्त्रिक पार्टी (प्रलोपा)ले देशैभरि भ्रष्टाचार विरोधी अभियान चलाउने भएको छ।
शुक्रबार काठमाडौंमा बसेको विस्तारित बैठकले भ्रष्टाचार विरोधी अभियान देशैभरि चलाउने गरी कार्यदल बनाउने निर्णय भएको नेता सुदन किराँतीले जानकारी दिए।
प्रलोपाले त्यसका लागि जिएस गुरूङको संयोजकत्वमा ६ सदस्यीय कार्यदल गठन गरेको छ।
कार्यदलमा जटिल कार्की, अमित खनाल (ऊर्जा), सम्झना राई, ध्रुव प्रसाद काप्री, मञ्जु मिक्चान र दीपक महतो सदस्य छन्।
बैठकले प्रलोपासँग बृहत एकता, ध्रुविकरण र सहकार्यका लागि सबै प्रगतिशील, लोकतान्त्रिक र देशप्रेमीहरूलाई आह्वान पनि गरेको छ।
त्यसका लागि वार्ता र संवाद गर्न पार्टी सँधै खुला रहेको पनि प्रलोपाले जनाएको छ।
साथै तोकिएकै समयमा निर्वाचन गराउनका लागि वातावरण बनाउन सबै पक्षहरूलाई प्रलोपाले आह्वान गरेको छ।
प्रलोपाले सरकारलाई चारवटा विषयमा ध्यानाकर्षण गराएको छ।
उसले जेनजी आन्दोलनको म्याण्डेट यथाशीघ्र पूरा गरी भ्रष्टाचारीलाई छानबिन गरी कारबाही गर्न माग गरेको छ।
त्यसैगरी भदौ २३ र २४ गते सरकारी पक्षबाट भएको नरसंहारको छानबिन गर्न गठित आयोगले तीव्र गतिका काम अगाडी बढाउन र दोषीलाई कारबाही सिफारिस गर्न प्रलोपाले माग गरेको छ।
आगामी निर्वाचनमा विदेशमा रहेका प्रवासी नेपालीको मतदान अधिकार सुनिश्चित गर्न पनि प्रलोपाले माग गरेको छ।
साथै नेपालभित्रै अन्य जिल्लामा रही आफ्नो मतदान केन्द्रमा पुगी मत प्रदान गर्न नसक्ने मतदाताका लागि आफू रहेकै स्थानबाट मत प्रदान गर्न मिल्ने व्यवस्था गर्न पनि प्रलोपाले माग गरेको छ।
-1763885487.jpg)
-1756446574.jpg)
-1746009348.jpg)
