नेपाल सरकारले श्रीलंका सरकारलाई बाढीको उद्धार तथा राहतका लागि दुई लाख अमेरिकी डलर सहायता गर्ने निर्णय गरेको छ।
परराष्ट्र मन्त्रालयले आइतबार एक विज्ञप्ति जारी गर्दै श्रीलंकामा आएको बाढीमा परी फसेका जनताको उद्धार तथा राहतका लागि दुई लाख अमेरिकी डलर सहयोग गर्ने निर्णय गरेको जानकारी दिएको छ।
'ऐक्यबद्धताको भावनास्वरूप नेपाल सरकारले उद्धार तथा पुनर्स्थापनाका लागि दुई लाख अमेरिकी डलरको सहयोग गर्ने निर्णय गरेको छ,' मन्त्रालयले जारी गरेको विज्ञप्तिमा भनिएको छ, 'यस विपत्तिबाट उठ्न श्रीलंकाली जनतामा रहेको दृढता र सहनशीलताप्रति नेपाल सरकार र नेपाली जनता पूर्ण विश्वास व्यक्त गर्छ।’
बाढीले श्रीलंकामा पुर्याएको क्षतिप्रति नेपाल सरकारले दु:ख समेत व्यक्त गरेको छ।
एक सातादेखि निरन्तर परेको वर्षापछि आएको बाढीका कारण श्रीलंकामा कम्तिमा १९३ जनाको ज्यान गएको छ। त्यस्तै, २०० जना बेपत्ता छन् भने २० हजारभन्दा बढी घरधुरीमा क्षति पुगेको छ।
-1746009348.jpg)
