मन रोईरोई एक्लै अलग भएको थिएँ: कमल थापा

सेतोपाटी संवाददाता

काठमाडौं, पुस १६

राष्ट्रिय प्रजातन्त्र पार्टी (राप्रपा) र राप्रपा नेपालबीच पार्टी एकता भएको छ।

बुधबार काठमाडौंमा एकता घोषणा सभाको आयोजना गर्दै दुई पार्टीबीच ६ बुँदे समझदारी पत्रमा हस्ताक्षर गरिएको हो।

एकता सभालाई सम्बोधन गर्दै राप्रपा नेपालका अध्यक्ष कमल थापाले आफूलाई वर्षौंपछि घर फर्किएको अनुभूति भइरहेको बताए।

उनले २०७८ सालको ऐतिहासिक महाधिवेशनपछि विभिन्न कारणले पार्टीबाट अलग एक्लै अलग्गिएको भए पनि देशभरको संगठनसहित घर फर्किएको जिकिर गरे।

उनले आफूमाथि लाग्दै आएको गीताको कसम खाएर पनि पार्टी फुटाएको तथा महाधिवेशन हारेर भागेको भनेर लाग्ने गरेको आरोपको खण्डन गर्दै त्यसमा कुनै सत्यता नभएको दाबी गरे।

उनले यो एकतामा आफ्नो कुनै स्वार्थ नरहेको जिकिर गरे।

उनले भने, ‘मलाई आज घर फर्केको अनुभूति भइराखेको छ। आफूले पनि रगत पसिना बगाएर खडा गरेको घरमा फर्कँदाखेरी जुन किसिमको अनुभूति हुन्छ अहिले मलाई त्यही भइरहेको छ। वास्तवमा २०७८ साल माघको अन्तिम साता अत्यन्तै भारी मनले मैले राष्ट्रिय प्रजातन्त्र पार्टी (घर) छोडेर गएको थिएँ, खुसीले होइन। मन रोईरोई एक्लै अलग भएको थिएँ। त्यसपछि मान्छेहरूले गीताको कसम खाएको मान्छेले पार्टी फुटायो भनेर आरोप पनि लगाएँ। हारेर भाग्यो पनि भने तर यी सबै आरोपहरूमा कुनै सत्यता छैन।’

उनले अगाडि भने, ‘एउटा खेलाडी पनि भएको नाताले हारलाई सहर्ष स्वीकार गर्ने चरित्र ममा छ। विभिन्न कारणले घर छोडेर गएँ। गीता छोएर पनि पार्टी फुटाएको र हारेर भागेको आरोप निकारण होला पनि भन्ने ठानेको छु। यद्यपि त्यसमा सत्यता थिएन।’

उनले गीता छोएर पनि पार्टी फुटाएको र हारेर भागेको आरोप असत्य आरोपहरू निराकरण भइसकेको आफ्नो विश्वास रहेको पनि बताए।