राष्ट्रिय प्रजातन्त्र पार्टीले प्रतिनिधि सभा समानुपातिकमा ११० जना उम्मेदवारको सूची निर्वाचन आयोगमा बुझाएको छ।
कतिपय क्षेत्र, जिल्लाबाट समानुपातिकमा सिफारिसमा नपरेका नेताहरूलाई पनि केन्द्रबाट सिधै नाम राखिएको र नेताका श्रीमतीलाई पनि समानुपातिक सूचीमा समावेश गरेको भन्दै पार्टीभित्रै विवाद भइरहेको छ।
साथै कमल थापा नेतृत्वको राप्रपा नेपालबाट पठाइएकामध्ये अधिकांशको नाम समावेश नगरिएको र केही नाम समावेश गरे पनि कलस्टरको अन्तिममा मात्रै नाम राखेको पाइएको नेताहरूको भनाइ छ।
राप्रपा र राप्रपा नेपालबीच बुधबार एकता घोषणा सभा भएको थियो भने पुस ९ गते पार्टी एकता सहमति भएको थियो।
राप्रपा प्रवक्ता ज्ञानेन्द्र शाहीले पार्टीभित्र समानुपातिक सूची सच्याउन सार्वजनिक रूपमै आग्रह गरेका छन्।
‘राप्रपा भित्रका समानुपातिक सूचीको लिस्ट सच्याउन बेलैमा अनुरोध गर्दछु। सच्याउने अझै समय छ, नेताका श्रीमती र अवसरका लागि पार्टी छोडेकालाई प्रमुख स्थानमा राखिनु दुर्भाग्य हो,’ उनले सामाजिक सञ्जाल फेसबुकमा पोस्ट गरेका छन्, ‘समानुपातिक व्यवस्था भनेको सम्पन्नका लागि होइन, विपन्नका लागि हो। यसको दुरूपयोग नगर्न सबैलाई अनुरोध गर्दछु।’
उनले यस्ता गतिविधिले नेताहरूको परिवार बने पनि पार्टीलाई हित नगर्ने बताएका छन्।
प्रवक्ता शाहीले वरिष्ठ उपाध्यक्ष बुद्धिमान तामाङ श्रीमतीसमेत रहेकी राप्रपा महिला संगठनकी नेता सरस्वती लामा र नेता खुस्बु ओलीप्रति लक्ष्य गर्दै असन्तुष्टि जनाएको देखिन्छ। सरस्वती लामाको नामा धादिङ राप्रपाबाट उम्मेदवार सिफारिस भएको थिएन।
ओली यसअघिको चुनावमा झापामा पार्टीले एमालेसँग गठबन्धन गरेपछि स्वतन्त्र उम्मेदवारी दिएकी थिइन्। उनलाई पार्टीले त्यसबेला कारबाही पनि गरेको थियो। तर अहिले समानुपातिकतर्फ खस आर्य महिलामा उनको नाम पहिलो नम्बरमा राखेको भन्दै पार्टीभित्र विरोध भइरहेको छ।
साथै राप्रपा नेपालले ४० जनाको नाम समानुपातिकमा राख्न पठाए पनि जम्मा ६ जनाको नाम मात्रै समावेश गरिएको भन्दै असन्तुष्टि बढेको छ।
‘हामीले अध्यक्ष कमल थापासहित ४० जनाको नाम समानुपातिकतर्फ समावेश गर्न राप्रपालाई पठाएका थियौं,’ एक नेताले भने, ‘तर जम्मा ६ जनाको नाम समानुपातिक सूचीमा देखेँ, त्यो पनि पुछारमा।’
राप्रपा र राप्रपा नेपालबीच एकता भइसकेको छ।
राप्रपाले २०६४ देखि २०७९ को चुनावसम्म पटक पटक समानुपातिकतर्फ अवसर पाएकाहरूलाई यसपालि समानुपातिक उम्मेदवार नबनाउने निर्णय गरेको थियो।
‘यो मापदण्डअनुसार कमल थापा समानुपातिकमा पर्ने कुरै भएन,’ लिङ्देननिकट एक नेताले भने, ‘राप्रपा नेपालका केही साथीहरू सूचीमा समावेश गरिएको छ।’
-ink-1767169644.jpeg)
-1746009348.jpg)
