बंगलादेशकी पूर्वप्रधानमन्त्री तथा बंगलादेश नेसनलिस्ट पार्टी (बिएनपी) की अध्यक्ष खालिदा जियाको पार्थिव शरीर ढाकाको शेरे–ए–बंग्ला नगरमा उनका दिवंगत पति जियाउर रहमानको कब्र नजिकै दफन गरिएको छ।
बंगलादेशका पूर्वराष्ट्रपति तथा मुक्ति युद्धका प्रमुख कमान्डर जियाउर रहमानको सन् १९८१ मे ३० मा चटगाँवमा सैन्य 'कू' क्रममा हत्या भएको थियो।
सुरूमा उनको शव चटगाँवको रंगुनिया पहाडी क्षेत्रमा दफन गरिएको थियो। पछि तत्कालीन सरकारले शवलाई ढाका ल्याई शेर–ए–बंगला पार्कमा राजकीय सम्मानका साथ दफन गर्यो।
हुसैन मोहम्मद इरशाद सरकारको समयमा उक्त पार्कको नाम 'चन्द्रिमा उद्यान' राखियो। पछि बिएनपी सरकार आएपछि नाम फेरेर 'जिया उद्यान' बनाइयो।
त्यसपछि अवामी लीग सरकारमा आएपछि पुनः 'चन्द्रिमा उद्यान' नामाकरण गरियो। तर हाल अवामी लीग सरकार पतन भएपछि त्यहाँ फेरि 'जिया उद्यान' को बोर्ड देखिन्छ।
राजनीतिक इतिहासका शोधकर्ता मोहिउद्दीन अहमदका अनुसार नाम जे भए पनि जियाउर रहमानलाई राजकीय सम्मानसहित यहीँ दफन गर्ने निर्णय तत्कालीन अस्थायी राष्ट्रपति अब्दुस सत्तारको नेतृत्वमा भएको थियो।
उनको जनाजादेखि दफनसम्मका प्रक्रियामा तत्कालीन उपमन्त्री एबिएम रूहुल हावलादार अमीन पनि उपस्थित थिए।
अमीनले बिबिसीसँग भने, 'प्रस्ताव सत्तारले राखेका थिए, जसलाई मन्त्रिपरिषदले सर्वसम्मतिले पारित गर्यो। सेना प्रमुख इरशादले पनि समर्थन दिए। जियाउर रहमानले देशमा बहुदलीय लोकतन्त्र स्थापना गरेका थिए, त्यसैले संसद भवन नजिक दफन गर्ने निर्णय भयो।'
बिएनपीको निर्णय अनुसार खालिदा जियालाई पनि राजकीय सम्मानका साथ जियाउर रहमानकै कब्र छेउमा दफन गरिएको छ।
लामो समयदेखि उपचाररत खालिदाको मृत्यु मंगलबार ढाकाको एक अस्पतालमा भएको थियो।
सन् १९८१ को राजनीतिक पृष्ठभूमि – जियाउर रहमानको हत्या
सन् १९८१ मे २९ मा पार्टीको मतभेद समाधानका लागि जियाउर रहमान दुईदिने भ्रमणमा चटगाँव पुगेका थिए।
सँगै रहेका नेताको बयानअनुसार उनी आधा रातमा सुत्न गएका थिए। केही घन्टापछि सैनिक अधिकारीहरूको समूहले चटगाँव सर्किट हाउसमा हमला गरे र गोली प्रहार गरे। त्यहीँ रहमानको मृत्यु भयो।
मे ३० को बिहान रेडियोबाट पहिलो पटक उनको निधनको सूचना प्रसारित गरियो।
त्यसपछि उपराष्ट्रपति जस्टिस अब्दुस सत्तारले अन्तरिम राष्ट्रपतिका रूपमा शपथ लिए।
त्यसै दिन राष्ट्रलाई सम्बोधन गरेर रहमानको निधन भएको औपचारिक रूपमा घोषणा गरियो।
हत्या भएपछि रहमानको शवलाई गोप्य रूपमा रंगुनिया पहाडी क्षेत्रतर्फ लगिएको थियो।
त्यति बेलाका पत्रपत्रिकाका अनुसार सैनिक अधिकारीहरूले शवलाई गोप्य ठाउँमा लगेर दफन गरेका थिए।
पछि सैन्य 'कू' मा सहभागी सैनिकहरूबीच फुट सुरू भयो र केही अधिकारीहरूले अब्दुस सत्तार सरकारको पक्ष लिन थाले। सरकारले विद्रोही सैनिकहरूलाई आत्मसमर्पण गर्न निर्देशन दियो।
मेजर जनरल मंजूर र कर्नल मतिउर रहमान लगायत धेरै अधिकारी मे ३१ को रात भागे। मंजूरलाई समातेर गोली हानी मारियो।
जुन १ मा तत्कालीन ब्रिगेडियर हन्नान शाहले जियाउर रहमानको शव भेट्टाए।
स्थानीय बासिन्दाले पहाडी भागमा नयाँ कब्र भएको बताउनासाथ सैनिक टोली त्यहाँ पुगेको थियो। माटो खनेर रहमान र दुई अन्य सैनिक अधिकारीको शव निकालिएको थियो।
उनको शवलाई पहिले चटगाँव छाउनी लगियो, त्यसपछि हेलिकप्टरमा ढाका पुर्याइयो।
जुन २ मा शव संसद भवनमा राखियो, ताकि आमनागरिकले श्रद्धाञ्जलि दिन सकून्।
त्यसै दिन १२:३० बजे मानिक मियाँ एवेन्यूमा जनाजा र १ बजे जियाउर रहमानलाई संसद भवन छेउको ताल नजिक दफन गरिएको थियो।
त्यो घटनाको ४४ वर्षपछि पतिपत्नी एउटै कबरमा दफन गरिएका छन्।
शोधकर्ता मोहिउद्दीन भन्छन्, 'जियाउर रहमानलाई दफन गर्न संसद क्षेत्र नै उपयुक्त मानिएको थियो। अवामी लीगका धेरै सांसद त्यो समारोहमा उपस्थित थिए।'
जियाउरकी पत्नी तथा पूर्वप्रधानमन्त्री खालिदा जियालाई पनि उही स्थानमा, उही कब्रको छेउमा दफन गरिएको छ।
-1746009348.jpg)
