सशस्त्र प्रहरीको गोली लागेर एक जना स्थानीयवासीको ज्यान गएको घटनाले तनाव निम्त्याएपछि सुनसरीमा वार्ता सुरू भएको छ।
जिल्ला प्रशासन कार्यालय इनरूवामा केही बेर अघिबाट छलफल सुरू भएको कोशी गाउँपालिका उपाध्यक्ष अनितादेवी यादवले जानकारी दिइन्।
'अहिले सिडिओ कार्यालयमा हामी छलफलमा छौं,' यादवले भनिन्, ‘प्रशासन र सुरक्षा निकायका जिल्ला प्रमुखहरू, जनप्रतिनिधि, मृतकका परिवारसहित छलफल चलिरहेको छ।'
जिल्ला प्रशासनमा सर्वपक्षीय छलफल जारी रहँदा त्यहाँभन्दा पश्चिममा रहेको लौकही बजार क्षेत्र भने तनावग्रस्त नै छ।
'लौकहीमा आक्रोशित स्थानीयवासीले प्रदर्शन जारी राखेका छन्,' उपाध्यक्ष यादवले भनिन्, 'हामी यहाँ वार्तामा छौं।'
नेपाल–भारत सीमा क्षेत्रमा खटिएको सशस्त्र प्रहरीले चलाएको गोली लागेर कोशी गाउँपालिका-१ का ४५ वर्षीय विजय साहको ज्यान गएको थियो। बुधबार बिहान १ः१० बजेतिर उनीमाथि सशस्त्रले गोली प्रहार गरेको हो।
त्यही घटनाको विरोधमा लौकही बजार क्षेत्र तनावपूर्ण बनेको हो। स्थिति नियन्त्रणमा लिन प्रहरीले अश्रुग्याससमेत प्रहार गरेको छ।
सशस्त्रले साहको ज्यान दोहोरो भीडन्तमा गएको दाबी गरेको छ। गाउँलेले भने सशस्त्रले गोली हानेर हत्या गरेको आरोप लगाइरहेका छन्।
सडकमा नाराबाजीसहित भएको प्रदर्शनका कारण सवारी साधन रोकिएका छन्।
सुनसरी प्रहरीका प्रवक्ता डिएसपी चन्द्र खड्काले स्थिति समान्य बन्दै गएको दाबी गरेका छन्। स्थानीयले भने अवस्था तनावपूर्ण रहेको जानकारी दिएका छन्।
४५ वर्षीय साह सिटी सफारीका चालक हुन्। उनले आफ्नो सिटीमा भारतबाट ल्याएको चिनी रोक्न खोज्दा आफूमाथि गोली प्रहार भएको सशस्त्रले बताइरहेको छ।
जबाफी हमलामा साह मारिएको सशस्त्रको दाबीलाई गाउँलेले मानेका छैनन्। लेनदेन नमिल्दा सशस्त्रले गोली प्रहार गरेको उनीहरूको आरोप छ।
-1746009348.jpg)
