नेपाली कांग्रेसका उपसभापति विश्वप्रकाश शर्माले मुलुकको वर्तमान राजनीतिक अवस्थाबारे गम्भीर समीक्षा आवश्यक रहेको बताएका छन्।
बुधबार धनुषामा पार्टीले आयोजना गरेको प्रतिज्ञा सभालाई सम्बोधन गर्दै उनले यस्तो बताएका हुन्।
उनले २०८४ मा हुनुपर्ने निर्वाचन २०८२ मै किन हुन लागेको हो? भन्ने विषयमा स्पष्टता आवश्यक रहेको बताए।
उनले अहिलेको विषम परिस्थितिमा कसलाई जिताउने भन्दा पनि मुलुकलाई कसले सम्हाल्न सक्छ? भन्ने मूल प्रश्न भएको उल्लेख गरे।
उनले मधेसलाई देशको अन्नको भण्डारका रूपमा व्याख्या गर्दै यहाँका किसानप्रति आभार व्यक्त गरे।
उनले देश र मधेस दुवै पीडामा रहेको उल्लेख गर्दै समाधान खोज्न राजनीतिक दलहरूले गम्भीर आत्मसमीक्षा गर्नुपर्ने धारणा राखे।
कांग्रेसले विशेष महाधिवेशनमार्फत रूपान्तरण भएर आएको दाबी गर्दै उनले देशका पहाड, तराई र हिमाल क्षेत्रमा देखिएका समस्याको समाधानको प्रतिज्ञा गर्न मधेस आएको दाबी पनि गरे।
उनले भने, ‘यो मधेस हामी सबै नेपालीको पेटमा अन्न पुर्याउने उर्वरभूमि हो। हामी मधेसका सबै आदरणीय किसा र किसानको पसिना तथा किसानले उत्पादन गरेको अन्नको एक एक दानाप्रति कृतज्ञता व्यक्त गर्नको लागि यहाँ आएका छौँ। अहिले देशलाई दुखिरहेको छ, मधेसलाई दुखिरहेको छ। यो बेला मूल प्रश्न कसलाई जिताउने भन्ने होइन। यो विषम परिस्थितिमा मुलुकलाई कसले सम्हाल्न सक्छ भन्ने मूल प्रश्न हो। २०८४ मा हुनुपर्ने निर्वाचन ०८२ मै किन हुँदैछ? नेपाली कांग्रेस आज पहाड, तराई, हिमाल कहाँ कहाँ कससलाई दुखेको छ? त्यसको समाधान के हुनसक्छ भनेर विशेष महाधिवेशनमार्फत एमआरआई गरेर आज मधेसमा प्रतिज्ञा गर्न आएको छ।’
उनले मुलुक र संविधानको रक्षा गर्न आगामी २१ फागुनमा हुने प्रतिनिधि सभा सदस्य निर्वाचनमा पार्टीलाई बहुमतका साथ विजयी गराउन समेत अपिल गरे। —न्युज एजेन्सी नेपाल
-1746009348.jpg)
